Lengpui Airport Contract diklo taka petu leh thawktu hi hrem phu I tih chuan sign ve rawh

Lengpui Airport chei that hna thawh mek hi PWD Project Division III hnuaiah contractor pahnih- Pu Zoramchhana Electric Veng, Aizawl leh KR Consruction, Pu Kamlova Chhangte (a hming dik tak Kamrul Islam Laksar), Thuampui, Aizawl ten an thawk a ni.

Lengpui Airport chei that hna thawh mek hi funding source hrang pahnih - Special Central Assistance (SCA) funding leh North East Special Infrastructure Development Scheme (NESIDS) funding atanga thawh a ni a. 

Pu Zoramchhana hian SCA funding hnuaia hna hrang hrang - Earth works, Dismantling Item, PCC works, RCC works, Brick Walling, Plastering, Tile Flooring, Ceiling & Panneling with ACO Board, Painting, Railing (Stainless Steel with Tuffen Glass), Door & Windows fittings, Temporary Laminated Board Partition, Roof Treatment, Sanitary Fittings leh Sub-Surface Cabel Channel siam hna te a thawk a, project amount hi Rs. 14,49,74,927.00 (cheng vaibelchhe sawmpali, nuai sawmli leh pakua, sing sarih, sangli zakua sawmhnih pasarih) a ni. Pu Zoramchhana hna hi special assistance fund atanga thawh niin 26.02.2021 khan work order pek nih thu RTI chhanna atangin hriat a ni. 

KR Construction (Kamlova Changte/Kamrul Islam Laskar) hian NESIDS funding hnuaia hna hrang hrang- Construction of Elevated Road, Construction of Departure Ramp (2 Nos), Extention of Baggage Make-up Area, SITC of MRV/VRF Centralised Air Conditioners, Internal Electrification of Terminal Building, Underground Cable (XLPE/PVC) for First Floor Conveyer Belt siam hnate an thawk a, hemi atana project amount hi Rs. 19,59,00,000.00 (Vaibelchhe sawmpakua leh nuai sawmnga pakua) a ni. KR Construction hian April ni 21, 2021 khan Airport tualzawl nawr fai hna an thawk tan a, hemi ni atang hian ngawrh takin elevated road sak hna hi an thawk chho a, a thawhna rate erawh agreement a awm loh avangin hmuh tur a awm lo a ni. 

Lengpui Airport hna atana Restricted Tender koh leh Work Order hi ni 20.09.2021 khan "Improvement/Upgradation of operational/non-operational facilities of Lengpui Airport (Sh: Elevated Road with connected component of Terminal Buiding)-ah pek chhuah chauh a ni a. Pu Kamlova/KR Construction hian work order nei lovin thla 5 vel hna a thawk hman tihna a ni.  

Thilsual Lian tak pahnih:

1) Contractor thlan dana induhsak uchuakna (nepotism):

Lengpui Airport hna in pek dan hian kalphung pangai tam tak a bawhchhia a ni. Hetiang hna lian tham (Contractor-te hna thawh hlutzawng belhkhawm hi Vaibelchhe 30 chuang a ni) Work Order awm lova Contractor-in thla 5 vel zet a lo thawk hi thil mak a ni. Work Order awm lova sum tam tak senna hna kalpui hi kalphung pangai a ni lo. Hetiang khawpa hna lian hi restricted tender hmangin a hmaa lo thawk sa chuan a hmu ta ngei a, Contractor pakhat zawk pawh PWD changtu Minister vua leh vang a ni bawk. 

Hetianga mi hmai eng pawh zah lova, dan palzama induhsak uchuakna (nepotism) hi ram tichhetu a ni. Hetiang hna lian tham restricted tender hmanga inpek pawh hi dan mausamna a ni. Hetiang kalphung hi ‘chhun pachanga insuamna’ (daylight robbery) ti ila a sual tam lovang. Mi zawng zawng hmuh leh hriata hetiang khawpa induhsakna uchuak (nepotism) hi Mizoram leh hnam zahlohna a ni. 

2) Lengpui Airport Cheithatna Slab Chim: Criminal Negligence

Lengpui Airport cheithatna hna thawh mek laia a chim hi thil dang vang niloin, Contractor-in a nih tur angin a thawk lo tihna a ni. Hetiang hnathawh chhia hi, hmanraw hman tur dik tak leh hman zat tura bituk sate hmang lovin, hlep tam thei ang ber an neih theihna turin a quality chhe zawk leh, hmanrua pawh a tlem thei ang ber an hman vang a ni fo thin. Hnathawh quality chhe tak tak avangin kan ram ro tling tur infrastructure te chu fur khat pawh daih lo a lo awm fo tawh thin a. Lengpui Airport hnathawh phei chu fur khat chu sawi loh, hna thawh zawh hmain a chim a ni. Hei hi thil runthlak tak a ni. 

He contract hna thawk tu hian a hnuaia hnathawktu leh midangte nunna atana hlauhawm thei ngai pawimawh lova, a chhe ber thleng thei dinhmuna a dah avangte, a hna anih tur ang taka thaa a thawk lo te hi ‘criminal negligence’ hnuaia dan bawhchhiatna lian tak a ni. Hetiang a thlenna kawnga mawh phur hmasa bertu (contract pe tu) a nihna angin PWD changtu Chief Minister hian mawh (moral responsibility) a la ngei bawk tur a ni. 

Hetianga hnathawh hi Mizoram tana rotling hnutchhiah tumna rilru awm lo, ‘Mizoram First’ thinlung pu loa hnathawh a nih avangin Zofate tan a huatthlala em em a. Mizoram leh hnam pawi an khawih a ni. Mizoram leh hnam laka hetiang thil dik lo titute hian an tih dik loh mawh an phurh ngei theih na turin hma lak tum a ni a. He thil diklo hawtu leh kan hmalakna min thlawp tute zawng zawngin in signature hmangin min thlawpna lantir turin kan sawmin kan ngen a che u. 

 

#mizoramfirst