Araw-araw, dumarami ang mga manggagawa sa mga pribadong sektor na natatanggal sa trabaho o kaya ay hindi na pinasusuweldo ng kanilang mga kumpanya, dahil sa krisis na dulot ng COVID-19.

Maraming kumpanya ang nakapagpagamit na rin ng leave credits sa kanilang mga empleyado, at nakapag-release na rin ng 13th month pay para sa 2020 o kaya ay ilang parte nito.

Marami-raming kumpanya na rin ang dumaraing at nagpapahiwatig na tagilid na ang kanilang sitwasyong pinansyal, at maaaring hindi na nila kayaning magpasweldo ng empleyado, o mas malala pa, ay baka mapilitan silang magtanggal na ng mga trabahador.

Sa ganitong diwa, hinihiling namin sa Gobyerno ng Republika ng Pilipinas at sa mga ahensyang nabanggit sa petisyon, na gawin ang lahat ng makakaya upang mapasweldo/mapasahod ang mga manggagawa sa mga pribadong kumpanya na tagilid na ang sitwasyong pinansyal dahil sa krisis na dulot ng COVID-19, HABANG HINDI PA BUMABALIK SA "NORMAL" ang sitwasyon, upang mailigtas ang mga manggagawa sa pagdaralita sa panahon ng pandemya.  

Alinsunod ito sa kahawig na plano ng mga ekonomistang sina Emmanuel Saez at Gabriel Zucman sa Europa, at sa mga katulad na sistema sa United Kingdom at Denmark.