Os veciños, comerciantes e usuarios de Esteiro (Muros) esiximos unha solución inmediata ante o peche da Pasarela Peonil de Evaristo.
Esta infraestrutura é un eixe de comunicación fundamental que une Creo co Maio, e a súa clausura prolongada está provocando un grave prexuízo á mobilidade diaria dos residentes, así como perdas económicas directas á hostalaría e ao comercio local.
Os informes técnicos confirman que a ponte sofre graves fallos de deseño e unha degradación estrutural acelerada pola corrosión mariña. Aínda que entendemos que a seguridade é o primeiro, non podemos permitir que a burocracia converta este peche nunha situación indefinida.
Dado que as deficiencias estruturais competen directamente á Administración do Estado (Costas), unímonos para esixir:
1. Axilización inmediata de todos os trámites para a redacción técnica e aprobación do proxecto de reforma ou reconstrución.
2. Asignación orzamentaria urxente para acometer as obras cun deseño garantido para o contorno mariño.
3. Transparencia nos prazos cun calendario claro para o inicio e fin das obras.
4. Habilitación dunha alternativa peonil segura e provisional mentres non se execute a solución definitiva.
Axúdanos coa túa firma a facer presión para que Esteiro recupere a súa pasarela canto antes. ¡A ponte de Evaristo non se pode esquecer!