بش نفسرو للناس الكل علاش نحن ضد التعليم عن بعد..

 نحن منظمة من شعارتنا المركزية " جامعة شعبية تعليم ديمقراطي ثقافة وطنية " و الجامعة الشعبية اللي نطالبو بيها هي اللي يتساوى فيها أبناء الشعب الكل يعني ما يتمرمدش فيها الزوالي و يجوع و نهار يخلط يقرا و عشرة لا على خاطر ظروفو التاعبة و اللي عندو فلوس يقرا بأحدث و قوى الإمكانيات و يكون متوفرلو كل شي و هذا للأسف مازال مش موجود في بلادنا يعني مازال ما عناش الجامعة الشعبية اللي نطالبو بيها

اليوم في الظروف الإستثنائية اللي تعيشها تونس وزير التعليم العالي يقر التعليم عن بعد !!! يعني اللي عندو حاسوب و تغطية و اعلامية ينجم يقرى و اللي ما عندوش يعني الزوالي ما يقراش و ما فما حتى مقترح إجراء جدي و مستحيل يتوفر في الظرف هذا باش الزوالي ياخذ فرصتو في التعليم . هذا بالإضافة إلى أنو ما فما حتى ضمان لجودة التكوين بحكم انو مش كل شي ينجم يتقرى عن بعد 

الوزارة اللي ما تحملتش مسؤوليتها في يوم ما بش تأمن سنة جامعية في وقتها و فما طلبة كملو في سبتمبر و اكتوبر على خلفية اضراب بعض الأساتذة، ليوم تقرر تعفس على الزوالي و تحرمو مالدراسة و تقضي على التعليم العمومي بش ما تضحيش من أجل سلامة كل الطلبة .

#لا_للتدريس_عن_بعد #من_أجل_جامعة_شعبية