As familias de Culleredo comprobamos, ano tras ano, que a situación da educación no concello de Culleredo presenta diversos problemas que, entendemos, precisan dunha solución global, nós percibimos:

1.  Que non existe un centro de secundaria na zona rural do concello, o que supón unha evidente desigualdade de oportunidades dos nenos e nenas do rural como consecuencia dos tempos de desprazamento cara aos institutos do concello.
2. A masificación dalgúns centros como o Eduardo Blanco Amor.
3. A falta de espazo, en centros como o IES Rego da Trabe, para dar admisión a todos os alumnos que recibe dos seus centros adscritos de primaria.
4. A infrautilización dun centro de primaria -Vila de Rutis- cunha matrícula mínima respecto da súa capacidade.
5. A existencia de centos de alumnos desprazados dende a zona urbana ao CEIP de Tarrío.
6. A infrautilización do IES Universidade Laboral en canto a liñas de bacharalato.

Demandamos unha solución por parte das autoridades que contemple todas as realidades. Inda que abertos a diferentes propostas de solucións, entendemos que estas deben pasar por:

1. A creación dun centro de secundaria no rural, sexa en forma de IES ou de CPI que evite o agravio comparativo que sofren as familias do rural en canto ao acceso aos estudos obrigatorios tal e como establece a Lei orgánica 8/2013, de 9 de diciembro, de mellora de calidade educativa [LOMCE] no seu artigo 1.B “A equidade, que garanta a igualdade de oportunidades para o pleno desenvolvemento da personalidade a través da educación, a inclusión educativa, a igualdade de dereitos e oportunidades que axuden a superar calquera discriminación e a accesibilidade universal á educación, e que actúe como elemento compensador das desigualdades persoais, culturais, económicas e sociais, con especial atención ás que deriven de calquera tipo de discapacidade”
2. A reorganización das zonas de adscrición aos diferentes centros que equilibre a demanda aos mesmos.
3. Facilitar a matricula no Vila de Rutis a aquelas familias desprazadas a outras zonas do concello.
4. A adscrición da futura secundaria do rural ao bacharalato no IES Universidade Laboral co fin de evitar a saturación do IES Eduardo Blanco Amor.
5. Igualar, á alza, a prestación de servizos en todos os centros.
6.  Mentres non se de solución ao centro de secundaria no rural, habilitar liñas de bus escolar con traxectos máis curtos.