Nú hafa of mörg tilfelli komið upp þar sem dýr eru alvarlega veik eða hafa slasast alvarlega og eigendur þeirra ná ekki í dýralækni á bakvakt vegna anna. Ástandið er slæmt bæði á Höfuðborgarsvæðinu og á landsbyggðinni. Við krefjumst þess að Dýralæknafélag Íslands, Fjármálaráðuneyti og Atvinnu- og nýsköpunarráðuneyti auki fjármagn sem þarf til að betrumbæta þjónustu dýralækna á bakvakt. 

Uppfærsla 13. apríl:

Jæja! Ég er mjög ánægð með viðbrögð frá Matvælastofnun en maður frá þeim hringdi í mig rétt í þessu til að útskýra betur hvað þarf að gerast til að breytingar verði á núverandi fyrirkomulagi hjá dýralæknum á bakvakt.
Matvælastofnun ræður því ekki hversu mikið fjármagn er sett í þessa þjónustu heldur eru það:

Dýralæknafélag Íslands
Fjármálaráðuneyti
Atvinnu og- nýsköpunarráðuneyti

Við viljum því beina þessum undirskriftum til þeirra! Matvælastofnun sér svo um að deila því fjármagni til að sem best þjónusta fáist fyrir dýrin okkar. Matvælastofnun gerir samninga við dýralækna og þeir dýralæknar þurfa svo að sjálfsögðu að vinna eftir settum reglum.

Annað sem MAST vill koma fram er mikilvægi þess að tilkynna það til þeirra þegar dýralæknir svarar ekki, gefur slæmar ráleggingar eða annað í þeim dúr. Það er hægt að senda inn tilkynningu gegnum www.mast.is

Í 9. grein laga um dýralækna og heilbrigðisþjónustu við dýr segir:
- Dýralækni ber að sinna störfum sínum af árvekni og trúmennsku og halda við þekkingu sinni. Dýralæknir ber ábyrgð á greiningu sjúkdóms og meðferð sjúklinga sinna.
- Dýralækni ber sem kostur er að upplýsa eiganda eða umráðamann dýrs sem hann fær til meðferðar um ástand, meðferð, horfur og væntanlegan kostnað af meðhöndlun og lyfjameðferð sé þess óskað. Einnig skal hann upplýsa eiganda eða umráðamann um þær hættur sem geta fylgt viðkomandi aðgerð, algengar aukaverkanir lyfja sem notuð eru og lyfjamengun afurða.
- Dýralækni ber, sé til hans leitað eða hann nærstaddur og náist ekki í vakthafandi dýralækni, að veita fyrstu nauðsynlega læknishjálp í skyndilegum sjúkdóms- eða slysatilfellum, nema þeim mun alvarlegri forföll hamli.
- Dýralæknar, sem stunda almennar dýralækningar, eiga rétt á og þeim ber skylda til að taka þátt í vaktafyrirkomulagi sem skipulagt er á viðkomandi vaktsvæði, sbr. 12. gr., nema þeir séu sjálfir sjúkir eða hindraðir af öðrum meira aðkallandi embættisstörfum. Dýralækni er heimilt að semja við annan dýralækni um að taka við vaktskyldunni.
- Verði dýralæknir var við eða hafi hann grun um að upp sé kominn alvarlegur smitsjúkdómur í dýrum á starfssvæði hans skal hann gera nauðsynlegar bráðabirgðaráðstafanir til að staðfesta gruninn, hefta útbreiðslu sjúkdómsins og koma í veg fyrir tjón sem af honum getur leitt. [Hann skal tafarlaust tilkynna Landbúnaðarstofnun um sjúkdóminn og gera í samráði við stofnunina ráðstafanir sem þurfa þykir.]1)
- Dýralækni ber að gera árlega skýrslu um læknisstörf sín og senda [Landbúnaðarstofnun].2) [Landbúnaðarstofnun]2) setur reglur um hvaða upplýsingar skýrslurnar skuli geyma.
- Dýralækni ber að sýna nákvæmni í útgáfu vottorða og læknisyfirlýsinga. Hann er bundinn þagnarskyldu um þá vitneskju sem hann öðlast í starfi sínu og honum er trúað fyrir og varðar ekki almannaheill.
- Dýralækni er einungis heimilt að auglýsa læknisstarfsemi sína með efnislegum og látlausum auglýsingum.

Í 12. grein laga um dýralækna og heilbrigðisþjónustu við dýr segir:
- Héraðsdýralæknar skulu skipuleggja vaktir í samráði við starfandi dýralækna innan sinna vaktsvæða þannig að dýralæknir sé þar jafnan á vakt og auðvelt sé að afla vitneskju um hvaða dýralæknir er á vakt hverju sinni. Heimilt er að skipta vakt innan sama vaktsvæðis milli fleiri dýralækna samtímis.
- Við skipulagningu vakta er ætlast til að tekið sé mið af vegalengdum og umfangi þjónustu innan viðkomandi vaktsvæða.
- Komi upp ágreiningur um skiptingu vakta innan vaktsvæða skal leita úrskurðar [Landbúnaðarstofnunar].2)
- Fyrir vaktþjónustu greiðist samkvæmt samningi Dýralæknafélags Íslands við landbúnaðar- og fjármálaráðuneyti.

Við teljum því augljóst að breyta þurfi því fjármagni sem MAST hefur til umráða svo hægt verði að veita dýrum á Íslandi þá aðstoð sem þau þurfa, hvenær sem er sólarhringsins.