Sa ki rive polisye yo jounen 12 mas 2021 an nan operasyon vilaj dedye a blese nou jouk nan nanm nou. Pèsonn pa dwe sibi zak sasinay ak imilyasyon nan kad travay li, sitou si travay li ki gen pou wè ak yon misyon ki nòb ki se pwoteje ak sèvi. Epitou polisye kap bay sekirite pa dwe paka jwenn ranfò lè lavi yo an danje. Pou tout rezon sa yo nou mande leta ayisyen pou dekrete jou 12 mas la jounen nasyonal lapolis nasyonal.

Jou 12 mas la dwe rete nan memwa nou pèp ayisyen kòm yon jou pou komemore lanmò jèn polisye yo ki te tonbe nan entèvansyon vilaj dedye a ansanm ak tout lòt ki tonbe nan lòt entèvansyon oubyen pandan yo t ap travay. Epi tou dat sa dwe rete yon jou refleksyon sou misyon lapolis la, kondisyon travay polisye yo ansanm ak danje metye a. Li dwe yon jou pou nou onore epi fè bèl jès ak fanmi polisye ki tonbe nan travay yo.