كاملين بنا عندنا ذكريات فالبحر د الرينكون و هوليداي بالذات. عمنا و ضحكنا و لعبنا و دوزنا كل صيف تما مع العائلات و الأصحاب ديالنا. بلحق مؤخرا بعد ما تم افتتاح فندق

Sofitel Tamuda Bay Beach and Spa

قامت الإدارة د الفندق باستغلال و تسييج واحد الجزء من البحر باش يبقى حصريا نالزبائن ديالوم. و هايداك كانو الناس كيمشيو و يعومو فديك الجهة و كل واحد كيديها فسوق راسه حتى واحد ما كيزعج آخر. و لكن فهاد الفترة و ف عز ما الناس مشغولين بكورونا قام الفندق بتمديد الحاجز حتى نالموجة بشكل غير قانوني، باش دستغله لصالحها. و حين قام رئيس جماعة المضيق بزيارة المكان و معاينته، قرر يبعت مراسلة كيطلب فيها من مدير الفندق يصلح وضعيته المالية، و هايداك كيحقلوم ديك الساعة يمنعو الناس يجلسو تما. اللي كيهمنا دابا هو أننا نوصلو صوتنا لرئيس الجماعة و المسؤولين عبر هاد العريضة باش ما يمرروشي الرخصة. الشاطئ د الرينكون كيبقى ضيق ما كاين لاش نزيدو نصغروه. لهذا كانطلب منكم أصدقائي و إخواني دوقعو هاد العريضة باش نسلموها نالسلطات و نوصلو رفضنا لتمرير الرخصة للفندق باش يبقى البحر ديالنا كاملين. العريضة حل قانوني ضامنولنا الدستور كوسيلة نالاعتراض و إيصال صوت المواطن للمنتخبين المحليين، اللي هما خدامين باش يحفظو مصالحنا ماشي يفرطو فيها. و كيجي الدور ديالنا بأننا حين نشوفو شي تجاوز او خرق أو قرارات ما عاجباناشي نعبرو عليها و نتحركو قانونيا. لذلك خايلاه سجلو أسماءكم وشي وسيلة د التواصل حيت غانحاول نتواصل معكم باش نوجدو وثيقة مكتوبة فآخر بالناس اللي غادوقع على العريضة الفعلية اللي غادتقدم نالسلطات.