ليوما تحوس في القروان، تلقى قداش من معلم تاريخي الباب متاعو مجدر بالاسمنت المسلح و لا تلقاه خربة قريب يطيح و لا تلقاه الاستغلال متاعو موش متطابق مع طبيعة المعلم...
اكثر من هذا!!! تلقى ساعات معلم من المعالم متسمّي على مجموعة من غير ما يكون مستغل او ينشط كيما محطوط على الاوراق.
ليوما الشباب، البيبان الكل مسكرة في وجهو و موش لاقي وين يتوجه.
هذا علاش، في اطار المشروع متاعنا حبّينا نوصلو صوتنا بالعالي و نكونوا الكل مع بعضنا، و ناصروا فكرة إستغلال المعالم التاريخية و الاثرية لصالح الشباب، المعالم هاذي تنجم تكون نوادي، تنجم تكون مراكز تكوين للشباب في مجالات بارشا مهمة؛ منها المسرح و منها الموسيقى و منها السينما و منها الخزف و علاش لا زادة! يتم استغلالها و توظيفها لاهداف تكوينية و مهنية للشباب او حتى استشارية لتوجيههم في مسيرتهم الاكاديمية و المهنية. 
ليوما انجموا مع بعضنا نتعاونوا على انه الشباب يبدل الواقع استنادا على الواقع متاعو، و ياخذ ولوْ شوية من زمام الامور و يغيّر. 
هذا علاش نحبوك ليوم تشارك في المشوار الي بديناه من 2019  و تكون معانا فاعل و يكون التغيير بامضاء من عندك.