Սեպտեմբերի 27-ի վաղ առավոտյան, ՔՈՎԻԴ-19 համավարակի ժամանակ, միանգամայն անտեսելով ՄԱԿ-ի Գլխավոր քարտուղարի՝ համընդհանուր զինադադարի կոչը, ալիևյան Ադրբեջանը, Էրդողանի Թուրքիայի օժանդակությամբ, լայնածավալ հարձակում է սկսել Արցախի շփման գծի ողջ երկայնքով՝ օգտագործելով ծանր հրետանի, տանկեր, օդային ուժ և հրթիռներ: Զինվորականների և քաղաքացիական բնակչության շարքերում արդեն իսկ կան ավելի քան հարյուր վիրավորներ և տասնյակ զոհեր, այդ թվում՝ առնվազն մեկ երեխա:  

Այս հարձակումն աննախադեպ է օգտագործվող ռազմական տեխնիկայի ծավալով և քանակով: Հասկանալի է, որ առաջնագծի  ողջ երկայնքով ներգրավվելու համար անհրաժեշտ է եղել իրականացնել կանխամտածված քայլեր և զինված ուժերի ու ծանր տեխնիկայի ռազմավարական տեղաշարժ, ինչը ենթադրում է, որ սա չէր կարող լինել հայկական ագրեսիային հակազդող գործողություն:  Սա ակնհայտորեն Ադրբեջանի կողմից լայնածավալ հարձակում է, որը սնուցվում/խրախուսվում է Թուրքիայի բարձրագույն քաղաքական ղեկավարության ռազմաշունչ հռետորաբանությամբ և միջազգային հանրության զգուշավոր դիրքով, որը վճռականորեն հետամուտ չի լինում բանակցությունները շարունակելու պահանջին:  Բացի այդ, Ադրբեջանն օգտագործում է առկա տեղեկատվության պակասը՝ մեդիա քարոզչության միջոցով ստեղծելով ընկալում, թե հայկական կողմն է նախահարձակ եղել:  Մի շարք վկայություններ կան այն մասին, որ Թուրքիան Սիրայից և Լիբիայից ահաբեկիչներ է տեղափոխել Ադրբեջան՝ պատերազմում վերջինիս օգնելու համար: Այն նաև Ադրբեջանին օժանդակում է զենքով և թուրքական անօդաչու սարքերով:

Մենք կարծում ենք, որ Թուրքիան բացահայտորեն աջակցում է  ահաբեկչությանն ու դրա տարածմանը և տարածաշրջանն ապակայունացնելու նպատակ է հետապնդում: Նաև կարծում ենք, որ եթե միջազգային հանրությունը ժամանակին ու համարժեք կերպով չարձագանքի, ռազմական գործողությունները կարող են դուրս գալ հակամարտության գոտու սահմաններից՝ հանգեցնելով լուրջ վայրագությունների և հումանիտար ճգնաժամի տարածաշրջանում, որն ավելի կսրվի կորոնավիրուսի համավարակի բռնկումների հետ կապված իրավիճակի պատճառով.

Դատելով տարածաշրջանի մյուս հակամարտություններից, որտեղ Թուրքիան իրականացրել է ռազմական գործողություններ, հնարավոր է ակնկալել անվերահսկելի զինված բախումներ՝ զինյալ խմբերի, և դրանցից առավել վտանգավորների՝ Իսլամական պետության խմբերի ներգրավմամբ: Այս տարածաշրջանը երկար ժամանակ ծայրահեղական զինյալ խմբերի աչքի թիրախն է եղել, և եթե ներկայիս սրացումը վերհսկողությունից դուրս գա, ոչ ոք ապահովագրված չի լինի մարդասիրական իրավունքի սկզբունենրի կատարյալ անտեսումից և Հայաստանի, Ադրբեջանի, ինչպես նաև ավելի լայն տարածաշրջանի քաղաքացիական բնակչության համար անկանխատեսելի զարգացումներից:

Միջազգային հանրությունը պետք է գործի հենց հիմա՝ ի պաշտպանություն հիմնարար իրավունքների և առաջին հերթին տարածաշրջանի բոլոր ժողովուրդների կյանքի և արժանապատվության իրավունքի: 

Մենք՝ ներքոստորագրյալներս, խստորեն դատապարտում ենք Թուրքիայի օժանդակությամբ՝ ադրբեջանական ռեժիմի ագրեսիան և դիմում ենք միջազգային հանրությանը: Պահանջում ենք հստակ քայլեր, որոնք կլինեն ավելին, քան հայտարարությունները, կկիրառեն պատժամիջոցներ և այլ միջոցներ՝ ռազմատենչ կողմին բանակցությունների սեղանին վերադարձնելու համար: Այժմ չգործելը լի է անկանխատեսելի հետևանքներով տարածաշրջանի և առհասարակ աշխարհի համար:

Կոչ ենք անում ՄԱԿ-ի Գլխավոր քարտուղարին ինչպես հարկն է պաշտպանել Մարդու իրավունքներն ու անվտանգությունը:

Կոչ ենք անում Եվրոպայի Խորհրդին գործել՝ ի պաշտպանություն Մարդու իրավունքների:

Կոչ ենք ՆԱՏՕ-ին հանրայնորեն դատապարտել իր անդամ երկրի՝ Թուրքիայի արարքը և անհապաղ միջոցներ ձեռնարկել վերջինիս կանգնեցնելու համար:

Կոչ ենք անում Եվրոպական Միությանը հանդես գալ Եվրոպայի և իր հարևանության խաղաղության ու կայունության պաշտպանությամբ:

Կոչ ենք անում ԵԱՀԿ Մինսկի խմբի համանախագահողներին հրատապ ու արդյունավետ միջոցներ ձեռնարկել՝ Թուրքիայի աջակցությամբ ադրբեջանական ռեժիմի ագրեսիայի վերջը տալու և հակամարտության խաղաղ կարգավորման բանակցությունները վերսկսելու ուղղությամբ: