Giisip ang terrorismo nga usa sa labing delikado nga hulga sa kalinaw sa usa ka nasud ug sa iyang katawhan. Kita nasayod nga aduna nay mga kaso sa terrorismo sa atong nasud nga nikutlo og mga kinabuhi, kabtangan ug mga pangandoy. 

Ang gobyerno, isip usa ka institusyon, gitahasan nga muhulma og mga balaud ug mga lakang nga buot manalipod sa iyang katawhan batok sa kagutom, kalisod, kahadlok, ug mga paglapas sa tawhanong katungod. Sa kasamtangang administrasyon, nahimong kontrobersyal ang pag-amendar sa Human Security Act of 2007 ngadto sa Anti-Terrorism Bill of 2020. Sa maong planong pagpatuman sa maong balaud, mas gipalapdan sa maong Anti-Terror Bill ang depinasyon sa terrorismo ug gibag-o ang iyang mga probisyon. 

Ang Abante Kabatan-onan, Usba ang Katilingban (AKU ang Katilingban), isip usa ka alyansa sa nagkalain-laing youth organizations sa Cebu nga nagpakabana sa tawhanong katungod ug kalambuan sa matag indibidwal, makusganong mubatok sa Anti-Terror Bill tungod sa mga mahinungdanong rason.

Sa maong balaud, mas gipalapdan ang depinasyon sa terrorismo sama sa seryosong pisikal nga kadaot sa isig kaingon, lihok nga makahataod og kahadlok sa publiko ug seryosong pagguba sa mga pasilidad sa gobyerno nga ang tumong kay ang paghimo ug kahadlok sa kadaghanan. Kining moang mga depinasyon, nagbilin kining walay klaro nga mamahimong magamit sa pagpang-abuso. 

Sa maong balaud, adunay gahum ang Anti-Terror Council nga mupadakop ug mupabilanggo sa bisan kinsa nga gidudahang indibidwal nga nagplano o nagbuhat og mga lihok “terrorista” nga nahisgutan sa maong balaud nga walay judicial warrant. Kini usa ka dakong kalapasan sa tawhanong katungod hilabi na sa dili makatarunganong pagpasangil ug katungod nga mapailawom sa legal nga pamaagi aron maprotektahan ang iyang kaugalingon ug mapamatud-an ang pagka-inosente. Sa maong pamalaud, mamahimong biktima ang bisan kinsa  gikan sa mga sayop nga pagpanangil. 

Sa kasamtangang panahon, nga nipatigbabaw ang pagpang-abuso sa tawhanong katungod ug mga kaso sa kalapasan nga ginabuhat mismo sa mga opisyales sa gobyerno, dili halayo nga kining Anti-Terror Bill, mamahimong maubusahan. Sa kasamtangang kahimtang sa politikanhong lihok sa atong nasud, mamahimong ngipon ang Anti-Terror Bill sa pagpahilom sa mga reklamo ug pangpaningil nga ginaduso sa nagkalain-laing sector sa atong katilingban. Ang mga kaso sa sayop nga pagpatay, pagpa-aresto ug pagpanangil, uban lamang sa mga pamatuod, nga nagpabiling problemado ang sistema sa hustisya, ug mamahimo kining madungagan sa pagpatuman sa Anti Terror Bill. 

Isip mga kabatan-unan, nasayod kami sa among katungod hilabi na partisipasyon sa paghulma ug mga nasudnong plataporma para sa kaayuhan sa tanan. Apan lakip sa maong katungod, kay ang katungdanan sa pagprotektar sa tawhanong kagawasan sa matag-usa. Ang AKU ang Katilingban Cebu, makusganong nanawagan sa tanan nga magpakabana sa mga posibleng hulga sa atong katungod, hilabi na sa posibleng pagpatuman sa Anti Terror Bill. Isip kabatan-unan, pangandoy namo ang kalinaw sa matag-usa apan dili kini mamahimong hinungdan aron mayatakan ang katungod sa kadaghanan. Taliwala sa nagkagrabe nga hulga sa atong pampublikong panlawas, kami nanawagan nga himoong prioridad sa atong gobyerno ang mga dinalian ug epektibong lakang sa pagsuta niining pandemia nga niatake sa atong nasud nga nihatag ug dugang kalisod sa matag Pilipino.