No actual contexto sanitario de crise causado pola enfermidade da Covid, tense advertido que a apertura dos centros educativos pode constituír un factor de risco social pola potencialidade de transmisión do virus que estes posúen. Nos diversos espazos educativos que constitúen a rede de centros públicos non universitarios de Galicia, é posible identificar os factores básicos que a OMS definiu como elementos determinantes na expansión do virus Covid-19:

• Neles conflúen grande cantidade de persoas en espazos xeralmente reducidos, e nos que non é posible garantir as distancias mínimas de seguridade.
• É imprescindible facer uso da voz nun ton elevado.
• Medidas básicas como a ventilación asidua vense reducidas á apertura de fiestras, o que non sempre será posible.
• A creación dos grupos de convivencia estable para Educación Infantil e Primaria constitúe unha situación de risco constante pois baséanse nunha estanqueidade que é imposible de garantir.
• O uso como norma de máscaras hixiénicas a partir dos 6 anos, que non son eficaces fronte á Covid, e a eliminación das normas do uso de máscaras FFP2 en situacións especiais.

Ademais, a Xunta de Galicia, desatendendo a normativa legal sobre riscos laborais, desenténdese de proporcionar aos profesionais dos centros de ensino un equipamento de seguridade que lles permita desenvolver o seu labor no contexto da pandemia, limitándose a proporcionar, para un período de tempo dun mes, máscaras hixiénicas, e deixando nas mans dos centros educativos a xestión da compra e control dos materiais precisos.

Por todo isto, solicitamos á Consellería de Educación e á Presidencia da Xunta de Galicia que desenvolva os procedementos normativos, orzamentarios e de xestión precisos para garantir a seguridade de todos os membros das comunidades escolares dos centros educativos públicos galegos. Nomeadamente, requirimos que se proceda a:

• Establecer unhas medidas sanitario-educativas máximas e idénticas para todos os niveis educativos.
• Tratar de xeito diferenciado a aqueles membros (profesorado, PAS, alumnado) que constitúan grupos de risco, con proteccións de alta seguridade.
• Prover de equipamentos EPI de máxima seguridade e formación adecuada para os membros dos Equipos Covid.
• Entregar a todo o alumnado unhas medidas de protección persoal básicas para garantir a seguridade de tod@s, evitar situacións de discriminación e verificar unhas mesmas características no equipamento de todo o alumnado.
• Fornecer todo o profesorado de máscaras FFP2 en cantidade suficiente para o curso escolar e, por se fosen precisas, pantallas faciais e batas desbotables.