Azərbaycan xalqının ümummilli lideri Heydər Əliyev demişdir: "Təhsil sistemi elə bir sistemdir ki, burada heç bir inqilabi dəyişiklik ola bilməz. "Amma təəssüf ki, ümummilli lider Heydər Əliyevin xeyir-duasi ilə yaradılan Qafqaz universiteti bu günlərdə inqilabi bir qərar ilə bağlanılır. Atılan bu addım Qafqaz Univesiteti haqqında hər zaman yüksək fikirdə olan ümummilli lider Heydər Əliyevin təhsil ideologiyasına da ziddir.
Əsas məqsədi dövlətini və millətini sevən, elmi və texnoloji biliklərə yiyələnmiş demokratik ruhlu mütəxəssislər yetişdirmək olan Qafqaz Universitetinin bağlanması Azərbaycan Təhsil sistemi üçün nə dərəcədə ciddi zərbə olacağı heç kimdə şübhə doğurmur.
Azərbaycan dövlətinin və şəxsən Prezident İlham Əliyevin diqqət və qayğısını daima hiss edən Qafqaz ailəsi ümid edir ki, dövlətimiz biz tələbələrin və bizim müəllimlərimizin yanında olacaq.
Biz Qafqaz Universitetinin vətənini və millətini sevən, amalları gələcəkdə xalqa xidmət etmək olan tələbələri olaraq, şəxsən özümüzün və ölkəmizin təhsilinə xələl gəlməsini istəmirik.
Sizdən çox xahiş edirik ki, keçmiş Qafqaz Universitetinin şəhərciyində yeni ali təhsil müəssisəsi yaradılsın və Qafqaz Universitetinin tələbə və professor-müəllim heyəti həmin müəssisədə öz fəaliyyətini davam etdirsin.