O NOSO BARRIO NON É UN VERTEDOIRO DE CEMENTO!

Aos veciños e veciñas de Lugo, ás autoridades da Xunta de Galicia e ao Concello de Lugo:

Nós, centos de veciños e residentes da zona dos barrios do Sagrado Corazón e de As Gándaras, unímonos para dicir BASTA. Non estamos en contra do progreso, nin do dereito á vivenda, pero negámonos rotundamente a que a nosa contorna sexa vítima dun urbanismo salvaxe, desmedido e alleo á realidade dos que habitamos este barrio.

A Xunta de Galicia pretende impoñer, baixo a etiqueta de "Interese Autonómico", a construción de 22 moles de cemento: un macroproxecto de 1.265 pisos nunha zona que hoxe respira como unha contorna semiurbana. O que propoñen non é un barrio, é un amoreamento de formigón que cambiará para sempre a nosa paisaxe e a nosa calidade de vida.

As nosas razóns son claras e contundentes:

-MASIFICACIÓN INSOSTIBLE: Pretenden meter a máis de 4.000 novos veciños nun espazo de 12 hectáreas. Isto supón duplicar a densidade da zona da noite para a mañá, convertendo unha área periférica e tranquila nunha ratoeira de cemento.

-DESTRUCIÓN DO MODELO DE BARRIO: O Sagrado Corazón e As Gándaras mantiveron sempre un equilibrio entre o urbano e o natural. Estas torres de 6 alturas máis ático (é dicir, sete) rompen por completo a estética e o espírito dun barrio das aforas, condenándonos a vivir á sombra de edificios desproporcionados.

-COLAPSO DE SERVIZOS E INFRAESTRUTURAS:

Onde están os servizos para estes novos miles de residentes? As nosas rúas xa sofren problemas de tráfico e baches, o noso centro de saúde cae a cachos... Construír casas sen garantir antes unha vida digna para quen xa estamos aquí é unha irresponsabilidade política.

-URBANISMO DE DESPACHO, NON DE BARRIO:

 Este proxecto deseñouse dende as oficinas de Santiago, ignorando a realidade de Lugo. É un "ladrillazo" que utiliza o pretexto da vivenda protexida para xustificar unha densidade edificatoria que só beneficia aos números, non ás persoas.

POR TODO ISTO, ESIXIMOS:

A paralización inmediata deste Proxecto de Interese Autonómico (PIA) nos seus termos actuais.

Un proceso de diálogo real coa plataforma de veciños e coa asociación Gatos Roxos. Non aceptamos que se decida o noso futuro sen escoitarnos.

Un modelo urbanístico sostible que aposte por construcións de baixa densidade, respectuosas coa contorna e dotadas de verdadeiros espazos verdes e servizos públicos reais.

Non somos só "solo residencial". Somos familias, somos historia e somos o futuro de Lugo. Non permitiremos que convertan a nosa casa nun polígono de formigón sen alma.

POR UN BARRIO VIVO, NON UN BARRIO DE CEMENTO! 

SÍ AO SAGRADO CORAZÓN E ÁS GANDARAS, NON ÁS 22 MOLES DE CEMENTO!