Petición cerrada

Contra l'escarniu al asturianu dende la Universidá d'Uviéu

Esta petición ha conseguido 3.018 firmas


Escribo esta petición dende un sentimientu personal, pero pensando nes voces de tolos poetes y de tolos falantes de la llingua asturiana que dalguna vez sintiéronse censuráos por usar la so llingua.

 

 

Ayeri, 26 d'ochobre, tuvo llugar nel Edificiu Históricu de la Universidá la presentación de l'antoloxía "Homenaje a los poetas de la Cátedra Emilio Alarcos", editada pola Cátedra Emilio Alarcos de la Universidá d'Uviéu. Pa la mesma, a la vez que se-y encargó al poeta Lorenzo Oliván una conferencia sobre universidá y poesía, lleeron dalgunos de los poetes incluyíos dos poemes caún.

Fui la primera que lleí. En primer llugar, recité un poema n’español na memoria d’Amparo Pedregal, feminista y profesora d'hestoria antigua de la Universidá. Depués, decantéme por un poema n'asturianu. Non por ánimu provocador, sinón, simplemente, porque nel últimu añu nun escribí casi en nada más que nun fuera na nuesa llingua. Dende la mesma mesa oí un murmuru, pero intenté nun da-y muncha importancia.

Cuando volví al mio sitiu dixéronme que les cares de la directora de la Catedra Emilio Alarcos fueron de rechazu cuando yo dixi que diba lleer n’asturianu. Sinceramente, nun me lo tomé en serio. Insisto: nun foi nengún actu de rebeldía, sinón de lleer lo que nesi momentu m'apetecía. Nun sabía que la posición de la Cátedra Emilio Alarcos fuera de total negación de la realidá llingüística d'Asturies. Amás, Claudia Elena Menéndez y Lluis Xabel Álvarez lleeran nel alcuentru orixe d’esta antoloxía n’avientu de 2013 los sos poemes n'asturianu, y asina fueron recoyíos na mesma. Llamentablemente, nengún dellos taben presentes ayeri.

Las llectures finaron con Miguel Alarcos, profesor de la Universidá d’Uvieu, poeta, y fíu de Emilio Alarcos y de Josefina Martínez, directora de la Cátedra.  Agradeció lo primero’l tar n'antoloxía, pero reconoció depués que consideraba una falta de respetu a la memoria del so padre que nella s’incluyeren poemes en llingua asturiana. Nesi momentu tol mundu entendió l’acusación como una respuesta a la llectura del mio poema, pero, más qu’a eso (que tamién) referíase a los poemes n'asturianu que figuren n'antoloxía, firmaos por xente como Claudia Elena Menéndez (que dende la so mocedá ta lluchando muncho pola llingua) y Lluis Xabel Álvarez (que lleva una vida faciéndolo).

Al final del actu, Roberto Sánchez Ramos, conceyal de Cultura por IU, mostróme’l so apoyu en priváu, como fixeron más ellí presentes.

Divagando yá un pouquiñín, tengo que reconocer que nesi momentu pensé en Claudia Elena, pero tamién en min, que tardé n'escribir n'asturianu porque nun me lo enseñaron na escuela, pero que nun foi más que la mio llingua materna: esa que creció en min gracies a les muyeres que me criaron, que me fixeron preguntame pol mundu y me dieron la voluntá pa conocelu, voluntá qu’agora reconstruyo a través de la llingua asturiana como una Sherezade que cuenta hestories pa nun morrer, o, al menos, pa nun facelo del too.

Reconózolo: entróme’l murniu al oyer les pallabres de Miguel Alarcos. Frustráronme y fixéronme sentir que, como nel Franquismu, sigue tando prohibío o  velao espresase na llingua qu’unu tien como suya. Paezme vergonzoso que, partiendo d'estes idees sobre la diversidá llingüística, la Cátedra Emilio Alarcos reciba subvenciones del Ayuntamientu d'Uvieu, y que la propia Universidá d’Uvieu nun condene’l mensaxe d’un profesor qu’atenta contra la conciencia llingüística de munchos falantes del Principáu. Con esta recoyida de firmes  lo únicu que se quier ye dexar constancia de que negámonos a que siga censurándose la llingua asturiana dende los órganos de poder y dende la Universidá d'Uviéu. 

 

Nun morreremos, porque, como Sherezade, nun vamos dexar de contar. 

 

 



Hoy: Raquel cuenta con tu ayuda

Raquel F. Menéndez necesita tu ayuda con esta petición «Ayuntamientu d'Uviéu, Ayuntamiento de Oviedo: Contra l'escarniu al asturianu dende la Universidá d'Uviéu». Únete a Raquel y 3.017 personas que ya han firmado.