O pasado 25 de xuño o Pleno do Concello de Betanzos aprobou a modificación da ordenanza fiscal nº9, de forma que queda suprimida a taxa especial para os locais de hostalaría do Campo- rúa dos Ferradores, praza de Domingo Etcheverría e Cantón de Claudino Pita- no mes de agosto.

É inxusto desculparlles a taxa de agosto a este grupo concreto de locais de hostalaría cando resultan beneficiarios de forma case exclusiva do gasto que fai o Concello, con cartos de todas e todos, nas orquestras, fogos de artificio, globo e demais espectáculos das festas patronais de San Roque.

A crise non pode servir de exusa para suprimir esta taxa mentres no presente ano subiu a tarifa da concesionaria do servizo municipal de auga e saneamento, os prezos da piscina e polideportivo municipais ou se acaba de subir a do servizo de axuda a domicilio, que son servizos de primeira necesidade para os veciños e veciñas e dan maior calidade de vida.

Ademais, é inxusto desculpar esta taxa cando o Concello nunca cobrou, nin esta taxa especial de agosto nin a ordinaria que se aplica o resto do ano, por todas as mesas que de forma adicional instalan estes establecementos durante o verán, sinaladamente nas festas patronais, Feira Franca Medieval, fins de semana,...

É o momento de reclamarlle ao Concello de Betanzos que anule esta modificación e manteña a taxa, porque se hai que perdoar impostos será a quen realmente o necesite.