Depi 2008, aprè siklòn Ana ak Ayk, teren Pakvensan an twouve l nan yon eta tèt chaje. Chak jou, chak semenn, chak mwa, chak ane ki pase, sitiyasyon pak la vin pi malouk. Lajan ap brase, lajan ap gaspiye, lajan ap gagote, Pakvensan vin alonje lis enfrastrikti espòtiv otorite yo bliye yo. Poutan, se pa ni 2 pwomès, ni 3 anons ki fèt pou renove pak la. Se nad marinad. Chodyè monte sou non Pakvensan, li desann nan pòch zagwo loraj san fwa ni lwa yo.

Sa fè plis pase 15 lane, yap woule moun Gonayiv nan farin pou zafè reyabilitasyon Pak sa a. Minis espò defile tankou mannken sou teren an. Poz premyè pyè fè mikalaw. Gwo lajan pale. Domaj, se te pawòl tafya.