尋晚，小濤將佢之前寫咗兩個幾鐘既臨別感言傳來，就係佢今朝錄音的內容。on air版本經過剪輯，以下係小濤親筆原汁原味的版本，託我send俾大家：
“ 這幾天，看到大家的留言，特別是那些讚美的說話，竊竊私喜之餘，也很感動和不捨，但更多的是受寵若驚受之有愧，真心覺得配不起這些稱讚。
一直以來，自問都是這個節目最沒貢獻的一個主持。KY雖然年輕，但醒目又識廣，看很多書兼博聞強記，從體育運動，到天文地理，然後人文科學，更不要說醫學和對女仔的了解，拋起書包時頭頭是道。我自己慣於直線思考，除了記者採訪工作及看中國問題的書，幾乎甚麼都不懂，又不懂講笑話唔識講故事，有時一開口就破壞了他們組織緊的攻勢，個波交到我度，唔係撻Q甩腳就係HOLD死咗，單刀都射唔入。換轉我係林公子，遇着個咁嘅拍檔，真的生不如死，一定掹啦，而我相信，佢返到去，一定同家嫂呻到樹葉都落晒嘅！
因此，當我決定辭職那一刻，只係想悄悄的走，正如我悄悄的來，心諗不要說有沒有人挽留，沒被請走都算偷笑了。但看到大家留言慰問、支持、不捨，特別是對我離職的理解，簡直係兩個世界，平行時空，很不真實。或許這就是自我形象和公眾形象的分別吧，幕後黑手當然係林公子了。
認識他的過程就不多說了，總之有一天RILEY打電話問我，可否做903晴朗替工主持，我都不知道為甚麼夠膽死應承。做了幾次，朱薰要生仔，RILEY和林公子就請我去九龍城一間CAFE食早餐，叫我轉為長做主持，我又不知道為甚麼胡里胡塗就應承咗。
最近的回顧系列，見返麥桃桃、潘居濤嘅海報，馬勒當濤的短片等，仲有中國有問題專家、ＨＫＵ王敏德、腸仔、滔滔、潘姑娘等等嘅朵，更加覺得佢功力深厚。我呢個咁平庸、毫無才華嘅人，佢都可以藉着大氣電波，突出我某Ｄ特點，整出百變形象。佢就係可以化腐朽為神奇，如果我都叫神奇嘅話。 睇住佢喺直播室搵Ｄ紙箱、紙皮、Ａ４紙等，用間尺ＣＵＴＴＥＲ、幾支顏色筆，就一邊做節目，一邊畫畫、做勞作仔，做出金像獎的小金人、哥哥張國榮的畫像等作品，真係創意無限，然之後度埋橋拍片展示呢Ｄ作品！勁到癲！
仲有熱廚房。做完節目，大家去錄音室吹幾下水，佢就諗到個故事出嚟，然之後大家入去錄音，一邊錄一邊度劇本，有時甚至係即時填歌詞去ＲＡＰ歌。太多嘢勒！所以，我好有信心，之後嘅新主持，一定可以被呢位仁兄發掘及放大佢嘅優點，只係需要少少時間啫，希望大家俾少少耐性。
七年之癢，婚姻呢關，我過咗，商台呢關亦都過到，惟獨晴朗呢一關，跨不過。對我而言，這份筍工應該係我前世修返嚟嘅。我日日坐喺度，免費睇是但噏演唱會，哈哈大笑兩個鐘，吖唔係，唔單止免費睇騷，仲有錢收。難怪ＭＡＲＣＯ話，你都好嘢啦，史上只有波叔梁醒波同埋肥姐係笑都有錢收咋，你係第三個呀。又係喎，呢Ｄ都係拜林公子所賜。
其實，遠不止於此。我地有好多次唔係呀馬活動，我都玩得超級開心，而最令我感動嘅當然係一生人第一次踏足利物浦主場嘅晏菲路球場，果次真係一生難忘，係我收到嘅最佳禮物。當然，還有大家送來的水密桃、糯米飯、杏仁茶等美食，太多難忘嘢，不能盡錄，更不能一一致謝。人生呢有聚有散，呢個世界無不散之筵席，好多時有Ｄ決定都係耐人尋味嘅，將來會唔會再見，大家拭目以待啦！再見了，各位朋友，總有一天，我地香港人可以昂首闊步，在晴朗的一天出發！願光明永耀我城！ ”