親愛的小濤、香港商業電台：

作為其中一名《903在晴朗的一天出發》的忠實聽眾，同好多香港人一樣，逢星期一至五朝早起身返工，其中一個動力同埋安慰，就係每朝都可以聽到903晴朗三子嬉笑怒罵，為我地帶來歡樂。

香港人在過去一年已經失去太多，正如好多人所講，香港變得越來越陌生，越來越唔似我地熟悉既香港。面對好多令香港人不能置信既新聞，面對好多令人不安、失望，甚至絕望既新聞，903晴朗三子透過嬉笑怒罵既方式，俾大家從一個不同既角度面對呢啲咁灰既新聞，俾大家一個喘息既空間，俾機會大家笑下，苦中作樂。

潘小濤作為903晴朗三子之一 (aka 滔滔、潘姑娘、潘大浪、麥桃桃、中國有問題專家、謝拉濤等)，香港資深傳媒人，資深中港時事評論員，但聽眾最愛既都係小濤既笑聲。小濤既笑聲為節目帶來既化學作用，除左令我地覺得林公子同KY講既野更好笑之外，更加令我地感受到你係一個好率直、好真誠、好可愛，同埋笑點好低既人 (笑)。每朝聽到小濤既笑聲，世界顯得無咁灰，香港仲有希望。

我地好明白小濤辭職係出於個人理由，我地亦都好尊重你的決定。不過，作為903晴朗的忠實聽眾，我地都想同商台一樣，對你作出極力的最後挽留！就算挽留唔成功，都希望你以後可以做嘉賓主持，一個星期最少五日。

小濤，You'll never walk alone！我地拭目以待。

一群903晴朗聽眾 謹啟