म एक आम नेपाली नागरिक हुँ। विगत केही दशकदेखि मैले मेरो देशमा राजनीतिक प्रणालीमा धेरै फेरबदल देखेको छु। राजनीतिक व्यवस्थाहरुको आवर्त, सरकारहरुको अदला-बदली र अनगिन्ती राजनीतिक एजेन्डाहरुले यहाँको जनताले अपेक्षित स्थिरता, समृद्धि र राष्ट्रिय एकता कहिल्यै प्राप्त गर्न सकेनन्। त्रिभुवन अन्तर्राष्ट्रिय विमानस्थलबाट हरेक दिन हजारौँ युवाहरु आफ्नो भविष्य खोज्न विदेशिएकै देख्दा मेरो मुटु पोल्छ। देशको राजनीतिक खिचातानीले यहाँ अस्थिरता यति बढेको छ कि जनताले अब राज्यको संरक्षण नै नपाएका जस्तो महसुस गर्न थालेका छन्। दलगत स्वार्थहरूभन्दा माथि उठ्न सक्ने बलियो र निष्पक्ष नेतृत्वको खोजीमा हामी नेपालीलाई हाम्रो आवाज सुनाउनु आवश्यक छ।

यो सम्पूर्ण परिवेशलाई मध्यनजर गर्दै, नेपालको शासकीय स्वरूप (राजतन्त्र वा गणतन्त्र) र देशको नेतृत्वबारे एक जनमत संग्रह मार्फत नेपालको भविष्यसम्बन्धी महत्वपूर्ण निर्णय लिइनुपर्छ। प्रधानमन्त्रीज्यूसँग अनुरोध छ कि नेपालको दीर्घकालीन स्थायित्व र समृद्धिका लागि यो ऐतिहासिक हस्ताक्षर अभियानलाई समर्थन गरियोस्।

एक करोड नेपाली नागरिकहरूको हस्ताक्षरसहितको ज्ञापनपत्रमार्फत हामी देशभित्र र विश्वभरि छरिएर रहेका सम्पूर्ण नेपाली नागरिकहरूलाई नेपालको शासकीय स्वरूप र नेतृत्वबारे निर्णय गर्न आग्रह गर्दछौं। हाम्रो अभियान राजनीतिक स्थिरता, राष्ट्रिय एकता र सर्वसाधारण नेपालीहरूको जीवनस्तरमा सुधार ल्याउन मद्दत पुर्‍याउने दिशामा केन्द्रित छ।

हामी सबै एकैसाथ मिलेर यो हस्ताक्षर अभियान सफल बनाऔं र हाम्रो देशको भविष्य सम्बोधन गर्न एक कदम अगाडि बढौं। तपाईंको हस्ताक्षरले हाम्रो अभियानलाई सशक्त बनाउन मद्दत गर्दछ। कृपया हस्ताक्षर गरेर यस जनमत संग्रहको लागि हाम्रो समर्थन देखाउनुहोस्।