Апошнія некалькі год у інфармацыйнай прасторы час ад часу ўзнікаюць спрэчкі аб напісанні беларускіх імёнаў і прозвішчаў на апошняй (міжнароднай) старонцы грамадзянскага пашпарта.

У цяперашні час МУС карыстаецца старой сістэмай транслітарацыі ICAO, якая была распрацавана з патрэбаў афармлення машыначытэльных радкоў унізе старонкі і ніяк не рэгулюе напісанне нацыянальных формаў імёнаў і прозвішчаў.

Пры гэтым супрацоўнікі органаў, што выдаюць пашпарты, часам робяць памылкі пры напісанні складаных імёнаў (ІСАО ў паасобных выпадках дае некалькі варыянтаў транслітарацыі).

Мы просім адказныя органы разгледзець пытанне аб стварэнні Інструкцыі па транслітарацыі ўласных імёнаў грамадзян Рэспублікі Беларусь на падставе беларускага лацінскага алфавіта, і выкарыстанні яе па змоўчанні. 

Вядома, што беларускі лацінскі алфавіт (аналагаў якога няма ў іншых усходніх славян) фанетычна і практычна падыходзіць для нашай мовы лепей за іншыя сістэмы транслітарацыі. Беларускі лацінскі алфавіт ужо зацверджаны для перадачы геаграфічных назваў і цалкам адпавядае міжнародным стандартам (ISO 9). 

Народы, якія маюць лацінаграфічныя алфавіты (французы, немцы, палякі, чэхі і інш.), у пашпартах выкарыстоўваюць менавіта свае алфавіты. Асобным прыкладам з'яўляецца сербская практыка выкарыстоўвання сербскага і кірылічнага, і лацінскага алфавіту ў пашпартах.

Мы лічым, што нам трэба пераняць досвед і карыстацца беларускім лацінскім алфавітам ў пашпартах.

Некалькі варыянтаў транслітарацыі:

Аляксандр Лукашэнка - Aliaksandr Lukašenka

Міхаіл Мясніковіч - Michail Miasnikovič

Уладзімір Макей - Uladzimir Makiej