Novas da Operación Aseos infantil Valle Inclán

Moi boa tarde pasada por auga de luns!

Escríbolle cun gran sorriso para comunicarlle que este venres pasado, 6 de novembro, achegámonos ao Concello de Oleiros varias nais (diademas de váter na cabeza incluídas, a xente pensaba que estabamos de despedida) do equipo de petición de instalación aseos nas aulas de infantil, xunto cun escrito e as firmas solicitadas para enviar a Xefatura Territorial da Coruña de Educación. Tamén remitimos unha copia a oa concelleira de Ensino e Xuventude de Oleiros e solicitado audiencia con ambas as partes, iso si, por separado. Xa vai sendo hora de que o xefe territorial coñeza as oxeras e canas destas nais e pais guerrilleiros e escoite a nosa voz, a voz dos que non teñen voz nin voto, a dos nosos pequenos.

Neste tempo tamén creamos unha páxina Feisbusiana e un Instagram coa finalidade de darlle maior visibilidade á petición e concienciar ao número máximo de persoas posibles sobre o problema de que os máis pequenos e profesores non conten con aseos seguros dentro das súas aulas de infantil.

Do mesmo iniciamos unha actividade reivindicativa, onde os nenos poden poñer o seu granito de area, neste caso de cor, pintando á nosa mascota Vateriño . Os pais que o desexen poden mandar o debuxo ou pegalo na xanela, tal e como se fixo durante a corentena cos arcoiris.

Oxalá que pronto sexan os nosos fillos os que se laven as mans e non os políticos.

Sen máis me despido con gratitude,

Moita saúde e saúdos!

Teresa Prado