A INICIATIVA CIDADÁ "CARBALLIÑO MÓVESE" ESIXE UN TRANSPORTE PÚBLICO MADRUGADOR CON OURENSE E CON PARADAS NAS ZONAS LABORAIS PARA A IDA E A VOLTA

·         A proposta reclama frecuencias que permitan chegar á capital antes das 7:30 da mañá e regresar ao rematar a xornada, con paradas en puntos estratéxicos de Ourense.

·         A falta de alternativas obriga a decenas de veciños a depender do coche privado diariamente, en plena escalada de prezos do combustible.

O CARBALLIÑO – A iniciativa cidadá  puxo en marcha unha campaña de mobilización e recollida de apoios para solucionar unha deficiencia histórica: a total ausencia de transporte público madrugador e funcional que conecte o municipio coa cidade de Ourense e a súa contorna industrial.

Esta proposta nace para dar resposta á desprotexión que sofren decenas de veciños que residen no Carballiño pero traballan na capital provincial ou nos seus polígonos. Profesionais de múltiples sectores (sanitario, educativo, funcionario e servizos) comezan as súas quendas ás 7:30 horas. Porén, o primeiro autobús non sae ata as 7:45 e o primeiro tren ás 7:50, polo que chegan cando as xornadas xa arrancaron. Esta desconexión horaria obriga aos usuarios a asumir en solitario o durísimo impacto económico da subida dos carburantes tanto para ir como para volver dos seus postos de traballo.

Beneficio económico e ambiental inmediato

Dende a plataforma destácase que habilitar este servizo non só alivia os petos dos traballadores, senón que é unha urxencia ecolóxica. Cada mañá, unha fileira de coches particulares realiza o mesmo traxecto de forma áxil pero individual pola AG-53 e a N-525. Ofrecer unha alternativa pública eficiente de ida e volta permitiría sacar decenas de vehículos privados da estrada, reducindo drasticamente as emisións de CO₂ e descongestionando os accesos a Ourense.

Alternativas viables e conectividade urbana integral

Solicitamos formalmente unha reestruturación ou ampliación dos servizos actuais para garantir unha conectividade real e adaptada aos horarios laborais. A iniciativa incide en que o transporte debe concibirse como un circuíto completo de ida e volta con paradas conectadas coas diferentes zonas estratéxicas de Ourense (como os polígonos industriais, o complexo hospitalario ou os centros administrativos), facilitando así tanto a chegada á mañá como a recollida dos traballadores ao remate da súa xornada.

Para logralo, considéranse dúas vías factibles:

·         Autobús lanzadeira de ida e volta: Unha frecuencia matutina que parta do Carballiño entre as 6:45 e as 7:00 horas con paradas clave en diferentes puntos de Ourense, e un servizo de retorno pola tarde que recolla aos traballadores nesas mesmas zonas urbanas e industriais.

·         Adecuación de horarios de tren e combinación con lanzadeiras: Adiantar a primeira frecuencia do tren rexional e coordinar os servizos de ferrocarril (tanto de ida como de volta) con autobuses ou lanzadeiras que distribúan e recollan de forma efectiva os usuarios nas distintas áreas de traballo.

A proposta busca o compromiso da veciñanza e das forzas políticas do Concello do Carballiño para trasladar de forma oficial esta demanda á Dirección Xeral de Mobilidade da Xunta de Galicia e ás empresas concesionarias. Fixar poboación na vila e ofrecer alternativas sostibles pasa, de forma inevitable, por adaptar o transporte á realidade laboral do século XXI.