Non ao trazado aéreo da liña de alta tensión en O Porriño

Pedimos á Xunta de Galicia e a Red Eléctrica de España que non autoricen o trazado aéreo proposto e que estuden alternativas de percorrido e soterramento que protexan a veciñanza e o noso territorio.

O proxecto dunha nova conexión eléctrica de 220 kV entre a futura subestación Bateas, en Vigo, e a liña Atios–Pazos de Borbén contempla un tramo aéreo ao seu paso por O Porriño, na contorna de Cans e Santa María do Porriño–A Risca.

Os nosos montes son parte da nosa vida: espazos de paseo, natureza e aproveitamento comunitario. Por iso, unha infraestrutura destas características merece unha avaliación rigorosa das súas afeccións e unha explicación clara das alternativas posibles.

Queremos que se analice o impacto sobre a paisaxe, as vivendas próximas, as parcelas, os montes comunais e as captacións de auga. Tamén reclamamos que se avalíe o efecto acumulado da nova infraestrutura coas liñas eléctricas xa existentes.

Entendemos a importancia de contar cunha rede eléctrica que responda ás necesidades da poboación e da industria. Precisamente por iso, pedimos unha solución planificada, xustificada e compatible coa protección do lugar no que vivimos.

Que solicitamos?
Que non se autorice o trazado aéreo nos termos actualmente propostos, e que se revisen as alternativas antes de adoptar unha decisión definitiva.
Que se estude de maneira efectiva o soterramento do tramo que afecta a O Porriño, así como outros percorridos que permitan reducir as afeccións. A comparación debe explicar a viabilidade técnica, os custos e os impactos ambientais de cada opción.
Que se avalíen as afeccións individuais e acumuladas, incluíndo a proximidade ás vivendas, as servidumes sobre as parcelas, os accesos de obra, os montes, as captacións de auga e a presenza doutras liñas eléctricas.
Que a veciñanza dispoña de información accesible, con planos comprensibles, identificación das propiedades afectadas e explicación das consecuencias do proxecto.
Que se escoite ás persoas afectadas e ás comunidades de montes e de augas, e que se dea unha resposta motivada ás súas alegacións.
Que as administracións e a empresa promotora coordinen unha solución para o conxunto do territorio, evitando trasladar as afeccións dunha parroquia ou dun concello a outro sen unha avaliación global.
Esta petición reúne apoio cidadán para trasladar estas demandas á Xunta de Galicia e a Red Eléctrica de España. As adhesións acompañarán un escrito presentado ante a Administración; non substitúen as alegacións particulares ao expediente.

Asina e comparte. Pedimos que se estuden as alternativas antes de decidir sobre o futuro dos nosos montes e das nosas parroquias.

O Porriño merece unha solución que protexa a súa xente e o seu territorio.