Quen non se viu afectado polo pésimo servizo de Monbus? Quen non tivo que coller o seguinte autocar? Ou o seguinte a ese? Quen non se sentiu presionado a compra-lo billete para asegurarse o sitio aínda cando dispón do desconto da Tarxeta de Transporte Galicia? Quen non chamou a ese número no que ninguén colle? Ou presentou unha reclamación detrás de outra para recibir exactamente a mesma resposta automática?

Unha e outra vez fican en terra clientes que non teñen outra opción. Non hai reforzos. Din que agardes por outro, que chames, que compres o billete con antelación... calquera excusa para lava-las mans e ter a conciencia tranquila.

Quen non ten visto como o conductor deixaba a alguén en terra porque o autobús estaba completo? Ou aínda peor, quen non viu como facía escoller aos que se atopaban fóra quen entraba porque só quedaba unha praza?

Xa é hora de facer algo. Se non atenden a reclamacións, a queixas, a chamadas... haberá que probar outras vías de acción. Sós non logramos nada pero xuntos quizais poidamos obrigalos a cumprir cun servizo digno.