Drejtuar: Deputetëve të Kuvendit të Shqipërisë

Prej më shumë se 3 muajsh, shqiptarët po protestojnë kundër Ramës & Berishës dhe sistemit, që ata kanë ndërtuar, me ndryshimet në Kushtetutë, duke filluar nga viti 2007. Ata thërrasin “Rama në burg, Berisha në burg”, sepse e kanë kuptuar, se binomi i tyre na ka sjellë këtu.

Në referendumin e vitit 1994, Populli refuzoi projektin e Kushtetutës gjysmë-presidenciale, sepse nuk donte njëshin e fortë në majë të piramidës, qoftë edhe për vetëm dy mandate presidenciale, sa parashikonte ajo Projekt-Kushtetutë! 

Këtë vullnet, Populli e rikonfirmoi në referendumin e 1998-s, kur miratoi një republikë parlamentare, me pushtete të balancuara.

Por Rama & Berisha e tradhtuan vullnetin e Popullit, duke na risjellë njëshin e fortë në majë të piramidës, me instalimin e republikës kryeministrore, madje pa asnjë kufizim mandati për kryeministrin, me ndryshimet e viteve 2007-2008! Në harkun e viteve 2007 – 2022, Rama & Berisha (ose Basha) e kanë ndryshuar Kushtetutën plot 7 herë (më i rëndësishmi ndryshimi i sistemit zgjedhor), por kurrë nuk kërkuan miratimin Popullit me referendum.

Dhe ja ku jemi sot! Në çdo 5 shqiptarë me të drejtë vote sot, 3 nuk kanë pasur mundësi të votojnë kurrë për Kushtetutën e tyre, sepse kanë lindur pas vitit 1980! I katërti zgjodhi të bojkotojë referendumin e 1998-s dhe nuk pati më një shans të dytë, për shtatë ndryshimet e 20 viteve të fundit. Ndërsa i pesti ka të drejtë të ndihet i tradhtuar, sepse votoi për republikën parlamentare, që Rama & Berisha e kthyen në republikë kryeministrore, pa e pyetur!

Është koha për një Kushtetutë të re, të miratuar me referendum popullor!

Por për këtë na duhet një ligj i mirë për referendumet, një detyrim kushtetues, që Rama & Berisha e kanë shkelur! Kemi ende në fuqi Kapitullin IX të Kodit të shfuqizuar Zgjedhor të 2003-shit, si një gjymtyrë të mumifikuar të një trupi të varrosur e të tretur. Rama & Berisha pranojnë zgjedhje për Kuvendin me pjesëmarrje 41% (përfshi votat me postë të Diasporës), por kërkojnë mbi 50% pjesëmarrje për referendumet (ndërkohë që përjashtojnë Diasporën). Rama qeveris dhe miraton ligje me 21% të votave të shqiptarëve, por kërkon mbi 33% vota pro në referendum për të shfuqizuar njërin nga ato ligje.

Deputetë! Keni vetëm pushtet të deleguar, nga Populli. Ai është Sovrani, jo ju! Shpallni qëndrimin tuaj sot: Jeni pro apo kundër një ligji të ndershëm për referendumet dhe një Kushtetute të re, të miratuar me referendum?