Ne, qytetarët shqiptarë që jetojmë dhe punojmë në Stuttgart dhe në gjithë rajonin e Baden-Württemberg-ut, i kërkojmë Qeverisë së Republikës së Shqipërisë dhe Ministrisë për Evropën dhe Punët e Jashtme të ndërmarrin hapa të menjëhershëm për hapjen e një Konsullate të Republikës së Shqipërisë në Stuttgart.

Aktualisht, qytetarët shqiptarë detyrohen të udhëtojnë shumë orë drejt Mynihut apo Berlin  për të përfituar shërbime konsullore, gjë që krijon vështirësi të mëdha, sidomos për familjet, të moshuarit dhe studentët.

Stuttgart ka një komunitet të madh shqiptarësh që kërkon dhe meriton një përfaqësi zyrtare ku të përfitojë shërbime si pajisja me pasaportë, legalizime dokumentesh, ndihmë për raste emergjente dhe shërbime të tjera të nevojshme.

Hapja e një konsullate në Stuttgart do të përmirësojë ndjeshëm përfaqësimin dhe lidhjen e shtetit shqiptar me qytetarët e tij në diasporë.

Na mbështetni me nënshkrimin tuaj për ta bërë këtë kërkesë realitet!