Posted by: Jerry Yap on August 2, 2014 in Bulabugin http://www.hatawtabloid.com/2014/08/02/monumento-ni-dr-jose-rizal-tuluyang-binastos-ng-torre-de-manila-2/ PARA palang bagyo kung magdesisyon ang Manila City Council. Paiba-iba ang ihip ng hangin… Noong una ay kinontra nila ang konstruksiyon ng 46-storey Torre de Manila ng DMCI. Mukhang nagamit pa nila noon ang rason ni cultural activist Carlos Celdran na masisira umano ang sacred skyline ng monumento ng dakilang bayani na si Dr. Jose Rizal. Pinaboran ng Konseho ang protesta ni Celdran at pansamantalang ipinatigil ang konstruksiyon ng nasabing condominium. Pero nito Enero 24, biglang nag-iba ang boses ng Maynila kaugnay ng 46-storey condominium na itinayo sa loteng dating kinatatayuan ng Jai Alai fronton. Inaprubahan na ang pagpapatuloy ng konstruksiyon at ayon kay Manila Councilor Joel Chat ‘este’ Chua ang nasabing proyekto ay makababawas umano ng P4 bilyones sa utang ng Maynila. UTANG na loob naman! Utang na naman ang ipinanangkalan para sa isang proyektong tinututulan pero sa MAGKANO ‘este’ sa ANONG dahilan at muling pinayagan?! Kikitain ba ng Maynila ang P4 bilyones sa isang condominium lang? Magkano ba ang amilyar sa Maynila?! Ay sus naman… Para namang mga bata lang ang kausap ninyo sa ginagawa ninyong eksplanasyon … ‘Yung logical naman Councilor CHUA … para naman mapaniwala kami! Ano na ang susunod na hakbang ni cultural activist Carlos Celdran? Paki-explain pa nga Councilor Chua, ‘yung laban o bawi ng Konseho ni Isko sa condominium na ito!? Nahahalata tuloy kayo n’yan!?