Pido ao Concello da Coruña inclusión no rueiro municipal dun espazo (avenida, rúa, praza) co nome Antonia Ferrín Moreiras.

Antonia Ferrín Moreiras defendeu en 1963 a primeira tese de astronomía que se leu na Facultade de Matemáticas da USC, pero ademais era a primeira tese que trataba de astronomía defendida por unha muller en España.

Sen ningunha dúbida Antonia foi unha muller extraordinariamente notable. Estudou, ensinou, investigou e traballou incansablemente nunha sociedade e nunha época onde as mulleres tiñan difícil realizar actividades fóra da casa.

Un municipio comprometido cunha gobernanza para todas e todos en igualdade, debe incorporar unha perspectiva de xénero que, entroutras políticas, estratexias e instrumentos, proporcione máis visibilidade a figuras e referentes femininos.

O nome das rúas forma parte da cultura popular, rememoran ou homenaxean a figura de personaxes públicos, case sempre masculinos pola diferenza dos roles tradicionalmente asignados a homes e mulleres, polo que a inclusión de personaxes femininos é un acto de xustiza e reparación.

As mulleres están pouco presentes no nomenclátor do termo municipal coruñés, unha desigualdade e agravio histórico que, se ben é certo que non é exclusivo da Coruña, debemos contribuír a paliar (datos de 2018 ubicaban en menos do 5% o número de rúas coruñesas con nome de muller).