തിരുവനന്തപുരത്തെ ചരിത്രപ്രസിദ്ധമായ മൃഗശാലയെ നെയ്യാറിലേക്കോ മറ്റേതെങ്കിലും വനാതിർത്തിയിലേക്കോ മാറ്റി സ്ഥാപിക്കാനുള്ള നിർദ്ദേശം ഉടൻ ഉപേക്ഷിക്കണമെന്ന് തിരുവനന്തപുരത്തെ പൗരന്മാരായ ഞങ്ങൾ കേരള സർക്കാരിനോട് അഭ്യർത്ഥിക്കുന്നു. വന്യജീവി വെറ്ററിനേറിയന്മാരും, പരിസ്ഥിതി സംരക്ഷകരും, മൃഗശാലാ പരിപാലന വിദഗ്ധരും മൃഗങ്ങളുടെ താൽപ്പര്യങ്ങൾ മുൻനിർത്തി മൃഗശാലയെ ഇപ്പോഴത്തെ സ്ഥലത്ത് തന്നെ നിലനിർത്തണമെന്ന് ഒരേമനസ്സോടെ  ശുപാർശ ചെയ്തിട്ടുണ്ട്. സെൻട്രൽ സൂ അതോറിറ്റി (CZA) അംഗീകരിച്ചതും 2035 വരെ കാലാവധിയുള്ളതുമായ മാസ്റ്റർ പ്ലാൻ വിഭാവനം ചെയ്യുന്നത് നിലവിലെ സ്ഥലത്ത് തന്നെ മൃഗശാലയുടെ നവീകരണം, ആധുനികവൽക്കരണം, സ്വാഭാവിക ചുറ്റുപാടുകളോട് കൂടിയ വാസസ്ഥലങ്ങളുടെ നിർമ്മാണം എന്നിവയാണ്; അല്ലാതെ മറ്റൊരു സ്ഥലത്തേക്ക് മാറ്റാനല്ല.

ഇത് വെറുമൊരു മൃഗശാലയുടെ പ്രശ്നമല്ല. 167 വർഷം പഴക്കമുള്ള ഒരു സംയോജിത പൈതൃക ഭൂപ്രദേശത്തിന്റെ പ്രശ്നമാണ്.

1857-ൽ മഹാരാജാവ് ഉത്രം തിരുനാൾ മഹാരാജാവും ബ്രിട്ടീഷ് റസിഡന്റ് ജനറൽ വില്യം കള്ളനും  ചേർന്ന് ലണ്ടൻ മൃഗശാലയുടെ മാതൃകയിൽ സ്ഥാപിച്ച ഈ 55 ഏക്കർ സമുച്ചയത്തിൽ, ഏഷ്യയിലെ ഏറ്റവും പഴക്കമുള്ള മൃഗശാലയ്ക്ക് പുറമെ നേപ്പിയർ മ്യൂസിയം (1880), നാച്വറൽ ഹിസ്റ്ററി മ്യൂസിയം, ശ്രീ ചിത്ര ആർട്ട് ഗാലറി, കെ.സി.എസ് പണിക്കർ ഗാലറി, ഇന്ത്യയിലെ തന്നെ ഏറ്റവും പഴക്കമുള്ള ബൊട്ടാണിക്കൽ ഗാർഡനുകളിൽ ഒന്ന് എന്നിവ ഉൾപ്പെടുന്നു. 167 വർഷങ്ങളായി പരിണമിച്ചുവന്ന ഈ സ്ഥാപനങ്ങൾ ചേർന്ന് മാറ്റാനാവാത്ത ഒരു നഗര പൈതൃക സമുച്ചയമാണ് രൂപപ്പെടുത്തിയിരിക്കുന്നത്.

ഈ സമുച്ചയത്തെ മുഴുവനായും  സംരക്ഷിക്കണമെന്ന് ഞങ്ങൾ ആവശ്യപ്പെടുന്നതിന്റെ കാരണങ്ങൾ:

1. പൈതൃകം പകരംവെക്കാൻ  കഴിയാത്തതാണ് 

ഒരു പാർക്ക് പൊളിച്ചുമാറ്റാൻ ആഴ്ചകൾ മതി, പക്ഷേ ഒന്ന് വളർത്തിയെടുക്കാൻ അനേക തലമുറകൾ വേണം. 387- അപൂർവയിനം മരങ്ങളും 400-ലധികമിനം  സസ്യജാലങ്ങളും ഉൾപ്പെടെ, മൃഗശാലയെക്കാൾ തന്നെ പഴക്കമുള്ള, ഏകദേശം 200 വർഷം പഴക്കമുള്ള മരങ്ങളുടെ ആവാസ കേന്ദ്രമാണ് ഈ സമുച്ചയം. 
ഈ പച്ചപ്പ് ഒരിക്കൽ കോൺക്രീറ്റ് കെട്ടിടങ്ങൾക്ക് വഴിമാറിയാൽ, എത്ര പണം കൊടുത്താലും അത് തിരികെ കൊണ്ടുവരാൻ സാധിക്കില്ല. 100 വർഷത്തിലധികം പഴക്കമുള്ളതിനാൽ ഈ പ്രദേശം മുഴുവൻ AMASR ചട്ടം 1958-ന്റെ സംരക്ഷണ പരിധിയിൽ വരേണ്ടതാണ്.

2. കാട്ടിൽ പണിയുന്ന  കൂടും മറ്റൊരു കൂട്  തന്നെ

നഗരത്തിലെ ഒരു പരിബന്ധനത്തിൽ /കൂട്ടിൽ  നിന്ന് മൃഗങ്ങളെ കാടിനടുത്തുള്ള മറ്റൊരു കൂട്ടിലേക്ക്‌ മാറ്റുന്നത് അവയെ സ്വതന്ത്രമാക്കുന്നില്ല. ഏകദേശം 100 സ്പീഷീസുകളിലായി 1000-ത്തിലധികം വരുന്ന മൃഗങ്ങളെ കടുത്ത യാത്രാ സമ്മർദ്ദത്തിനും, ആരോഗ്യ പ്രശ്നങ്ങൾക്കും, മരണത്തിനു പോലും ഇത് വിധേയമാക്കുന്നു. മാത്രമല്ല, നെയ്യാറിലെ /മറ്റു വനങ്ങളിലെ വന്യജീവികൾക്ക്  ജന്തുജന്യ രോഗങ്ങൾ പകരാനുള്ള ഗുരുതരമായ സാഹചര്യം ഉണ്ടാക്കുകയും ചെയ്യുന്നു.. യഥാർത്ഥ മൃഗക്ഷേമം എന്നാൽ നിലവിലുള്ള സൗകര്യങ്ങൾ നവീകരിക്കുക എന്നതാണ്, നിർബന്ധിതമായ കുടിയൊഴിപ്പിക്കൽ അല്ല.

3. ലണ്ടന് കഴിയുമെങ്കിൽ നമുക്ക് എന്തുകൊണ്ട് കഴിയില്ല?

പ്രശസ്തമായ ലണ്ടൻ മൃഗശാല സെൻട്രൽ ലണ്ടന്റെ ഹൃദയഭാഗത്ത് വെറും 36 ഏക്കറിൽ സ്ഥാപിക്കപ്പെട്ടിരിക്കുന്നു . അതിന്റെ നഗരകേന്ദ്രികൃത  സ്ഥാനം പൊതുജനങ്ങൾക്ക് കൂടുതൽ പ്രവേശനവും  ,വേഗത്തിലുള്ള അടിയന്തര വെറ്ററിനറി പരിചരണവും,ശക്തമായ ഗവേഷണ സഹകരണവും ഉറപ്പാക്കുന്നു. സ്ഥലപരിമിതിയായിരുന്നു പ്രശ്നമെങ്കിൽ,ലണ്ടൻ മൃഗശാലയുടെ അതെ സ്ഥലവിസ്തൃതിയിലുള്ള  നമ്മുടെ മൃഗശാലയുടെ സംരക്ഷണ ചരിത്രം തന്നെ ഉണ്ടാകുമായിരുന്നില്ല.

30-ലധികം മൃഗങ്ങൾ, പക്ഷികൾ, ഉരഗങ്ങൾ എന്നിവയെ വിജയകരമായി പ്രജനനം നടത്തിയതിന്റെ തെളിയിക്കപ്പെട്ട ചരിത്രം ഈ മൃഗശാലയ്ക്കുണ്ട്. സിംഹവാലൻ കുരങ്ങ്, കരിങ്കുരങ്ങ്, ബാരാസിംഗ മാൻ , റോയൽ ബംഗാൾ കടുവ, നീർനായ, റിയ തുടങ്ങിയ അത്യപൂർവവും തദ്ദേശീയവുമായ ഇനങ്ങളും നിരവധി വംശനാശഭീഷണി നേരിടുന്ന പക്ഷികളും ഇതിൽ ഉൾപ്പെടുന്നു. ഇപ്പോഴത്തെ സമുച്ചയം നൽകുന്ന സുസ്ഥിരതയുള്ള  സൂക്ഷ്മ കാലാവസ്ഥയും അസ്വസ്ഥമാക്കപ്പെടാത്ത പച്ചപ്പും കൊണ്ടു മാത്രമാണ് ഈ വിജയം സാധ്യമായത്.

4. ശബ്ദശല്യം ഒരു തെറ്റായ വാദമാണ് 

നഗര ശബ്ദം മൃഗങ്ങളെ ദോഷകരമായി ബാധിക്കുന്നു എന്ന അവകാശവാദത്തിന് തെളിവുകളില്ല. ആദ്യകാല  രൂപകല്പന ചെയ്തവർ മൃഗശാലയെ നാലു വശത്തുനിന്നും  ബുദ്ധിപൂർവ്വം സംരക്ഷിച്ചു - ഇന്ത്യയിലെ ആദ്യകാല മഴവെള്ള സംഭരണ സംവിധാനങ്ങളിലൊന്നായ ഇവിടത്തെ  കൃത്രിമ തടാകം, നേപ്പിയർ മ്യൂസിയവും ബൊട്ടാണിക്കൽ ഗാർഡനും, ചുറ്റുമുള്ള ആർട്ട് ഗാലറികളും മൃഗശാലയ്ക്ക് ബഫറായി പ്രവർത്തിക്കുന്നു.. കാമ്പസിനുള്ളിൽ യാതൊരു വിധ ഗതാഗത ശബ്ദങ്ങളും  കേൾക്കാനാവില്ല. സന്ദർശകരുടെയും പക്ഷികളുടെയും മൃഗങ്ങളുടെയും  ശബ്ദങ്ങൾ മാത്രമേയുള്ളൂ.

5. കാലാവസ്ഥാ വ്യതിയാനത്തിനെതിരെയുള്ള നമ്മുടെ കവചം

വായു മലിനീകരണമോ ചൂടിൻറെ സമ്മർദം മൂലമോ ഈ മൃഗശാല  മാറ്റി സ്ഥാപിക്കേണ്ടതുണ്ടെന്ന് കാണിക്കുന്ന വിശ്വസനീയമായ ശാസ്ത്രീയ റിപ്പോർട്ടുകളൊന്നുമില്ല. ഈ 55 ഏക്കറിൽ  ഇടതൂർന്ന പച്ചപ്പ് ചുറ്റുമുള്ള താപനില ഗണ്യമായി കുറയ്ക്കുകയും, വായുവിന്റെ ഗുണനിലവാരം മെച്ചപ്പെടുത്തുകയും, 100-ലധികം ഇനം സ്വതന്ത്രമായി വിഹരിക്കുന്ന പക്ഷികൾക്കും, 120 ഇനം ചിത്രശലഭങ്ങൾക്കും, എണ്ണമറ്റ ചെറുസസ്തനികൾക്കും ആവാസവ്യവസ്ഥ ഒരുക്കുകയും ചെയ്യുന്നു. ഇതിന് പകരം ഒരു കോൺക്രീറ്റ് പ്ലാസ നിർമ്മിക്കുന്നത്  നഗരത്തിൽ ഒരു  താപ ദ്വീപ് സൃഷ്ടിക്കുകയും നഗരത്തെ കൂടുതൽ  വാസയോഗ്യമല്ലാതാക്കുകയും ചെയ്യും.

6. പറിച്ചുമാറ്റലിലല്ല , വിദ്യാഭ്യാസത്തിലാണ് നിക്ഷേപിക്കേണ്ടത്

മൃഗശാല മാറ്റി സ്ഥാപിക്കലിനായി നൂറുകണക്കിന് കോടികൾ ചെലവഴിക്കുന്നതിന് പകരം ഈ തുക നിലവിലെ സംവിധാനത്തിൽ നിക്ഷേപിക്കുക .. സെൻട്രൽ സൂ അതോറിറ്റി (CZA) അംഗീകരിച്ച 2014-2035 മാസ്റ്റർ പ്ലാൻ തന്നെ വിഭാവനം ചെയ്യുന്നത് ഇപ്പോഴത്തെ സ്ഥലത്തെ  മെച്ചപ്പെടുത്തലും, നവീകരണവും, കൂടുതൽ പ്രകൃതിദത്തമായ പരിബന്ധനങ്ങളുടെ  നിർമ്മാണവുമാണ്, അല്ലാതെ മൊത്തമായി മാറ്റി സ്ഥാപിക്കലല്ല. പ്രതിവർഷം 14 ലക്ഷത്തിലധികം വരുന്ന സന്ദർശകർക്ക്, വിശേഷിച്ചു നമ്മുടെ പുതിയ തലമുറയായ  സ്കൂൾ കുട്ടികൾക്ക്, വന്യജീവി സംരക്ഷണം,സഹജീവി സ്നേഹം, സംരക്ഷണ പ്രജനനം മറ്റു പ്രാപ്യമായ വന്യജീവി വിദ്യാഭ്യാസം എന്നിവയ്ക്കായി മെച്ചപ്പെട്ട ഒരു കേന്ദ്രമായി ഈ മൃഗശാലയെ മാറ്റാൻ  ഞങ്ങൾ ആവശ്യപ്പെടുന്നു.

നമ്മുടെ നഗരത്തിലെ ഏറ്റവും പ്രധാനപ്പെട്ട പച്ചപ്പും പൈതൃക മേഖലയും ഒരു വാണിജ്യ സമുച്ചയമാക്കി /നഗര ചത്വരമാക്കി മാറ്റാനുള്ള ഏതൊരു ശ്രമത്തെയും ഞങ്ങൾ ശക്തമായി എതിർക്കുന്നു. സുസ്ഥിര വികസനം എന്നാൽ നിലവിലുള്ള പൈതൃകവും, മരങ്ങളും, ജൈവവൈവിധ്യവും സംരക്ഷിച്ചുകൊണ്ട് നഗരത്തിലെ മറ്റെവിടെയെങ്കിലും ഉപയോഗിക്കാതെ കിടക്കുന്ന സ്ഥലങ്ങൾ പുതിയ പൊതു സൗകര്യങ്ങൾക്കായി,തുറന്ന ഹരിത ഇടങ്ങൾക്കായി  ഉപയോഗിക്കുക എന്നതാണ്. പുതിയ നിർമ്മാണങ്ങൾക്കായി നമ്മുടെ നഗരത്തിന്റെ വ്യക്തിത്വവും ഓർമ്മകളും മായ്ചുകളയാൻ  ഞങ്ങൾ അനുവദിക്കില്ല.

തിരുവനന്തപുരത്തെ പൗരന്മാർക്കൊപ്പം നിൽക്കാനും നമ്മുടെ ഹരിത ഭാവി സംരക്ഷിക്കാനും ദയവായി ഈ നിവേദനത്തിൽ ഒപ്പിടുക.