Грамадскі Трыбунал над сталінізмам ў Беларусі заклікае грамадзян Рэспублікі Беларусь, беларусаў замежжа паставіць свой подпіс пад гістарычным  дакументам - "Абвінаваўчым заключэннем грамадскага трыбунала па разгляду злачынстваў сталінізму ў Беларусі".

 Вывучаная Грамадскім трыбуналам доказная база пацвярджае вінаватасць камуністычнай партыі Савецкага Саюза і створанай ёю сістэмы карных органаў (ЧК-ВЧК-ГПУ-ОГПУ-НКВД-МГБ-КГБ) у арганізацыі і ажыццяўленні масавых рэпрэсій супраць свайго народа і замежных грамадзян.

Беларусь не можа стаць дэмакратычнай дзяржавай, не асудзіўшы сталінскі рэжым і не ўвекавечыўшы памяць сваіх грамадзян, якія сталі ахвярамі палітычных рэпрэсій.

Сталінізм не павінен мець шанцаў на адраджэнне. Краіна, якая не можа ці не хоча адкрыта прызнаць злачынствы і памылкі сваіх папярэднікаў, асуджаная на іх паўтарэнне.