Nesti momentu, finales de setiembre, hai 12 centros educativos n'Asturies que pasáu un mes nun tienen mayestru/a de llingua asturiana, too ello pola incompetencia y la falta de previsión de los/es responsables de la Conseyería d'Educación d'Asturies.

Durante'l cursu escolar 2012-13 foi evidente que les llistes d'asturianu taben escosaes, y que yera necesario abrir una llista nueva que facilitare la incorporación de nuevos docentes pa evitar la situación que se ta dando nesti cursu 2013-14. Pasáu un mes dende que se dexaron ensin axudicar places de mayestru/a la Conseyería d'Educación tovía nun se dignó a abrir el procesu de creación d'una nueva llista d'asturianu.

Una vez más ye evidente la necesidá de:

1. Declaración d'oficialidá por parte de la Xunta Xeneral d'Asturies pa dignificar l'estatus de la llingua asturiana na escuela y na sociedá, y como garante xurídicu.

2. La creación de la especialidá de llingua asturiana por parte de la Conseyería d'Educación. Promesa reiterada en delles ocasiones por parte de la so responsable Ana González, que tovía nun tien nenguna concreción pola so parte.

3. Convocatoria pública d'oposiciones al cuerpu de mayestros/es y profesores de llingua asturiana, como midía pa dar estabilidá a l'asignatura y garantizar unes condiciones igualitaries col restu de materies.

4. Apertura de les llistes de llingua asturiana pa garantizar que nun queden places ensin axudicar.