Tryggjum öryggi vegfarenda í Ölfusi

0 have signed. Let’s get to 1,000!


Við, íbúar í Ölfusi og aðrir hagsmunaaðilar, skorum á Bæjarstjórn Ölfuss, Vegagerðina, fjarskiptafyrirtækin ásamt ríkisstjórn Íslands að bæta öryggi okkar sem ferðumst um Þrengslaveg og Þorlákshafnarveg (veg 38&39, hér eftir nefndur sem einn vegur). Við teljum að viðhaldi og þjónustu við veginn ásamt öðrum fáfarnari vegum í Ölfusi sé verulega ábótavant og með öllu óviðunandi. Við lýsum yfir þungum áhyggjum af því að með tilkomu fraktflutninga í Þorlákshöfn og stóraukinni umferð hópferðabifreiða með ferðamenn muni stórhættulegu ástandi einungis fara hríðversnandi.
Til að gera aðstæður enn hættulegri er á löngum kafla ekkert símasamband sem á ekki að þekkjast árið 2017.

Vegurinn er samkvæmt slysatölum Umferðarstofu sá allra hættulegasti í dreifbýli ef litið er til slysa með meiðslum per kílómeter á árunum 2012-2016 [Samgöngustofa: Umferðarslys á Íslandi 2016].

Það sem við teljum gera veginn jafn hættulegan og hann er er meðal annars:

  • Léleg ending olíumalar sem notuð er sem slitlag.
  • Stóraukin umferð ferðamanna, hópferðabifreiða og þungaflutninga.
  • Slitlag þolir engan veginn þann umferðarþunga og þungaflutninga sem um hann fer.
  • Jaðar slitlags vegarins er ónýtur sem veldur því að ökumenn þurfa að aka "á miðjunni".
  • Holur og slit eru seint og illa löguð sem krefst þess að ökumenn fari oft alveg yfir á öfugan vegarhelming.
  • Vegaxlir eru ekki til staðar og ná akreinar út fyrir slitlag. Á flestum stöðum er bratt niður af vegi og því nánast hvergi hægt að koma ökutækjum út fyrir veg þegar þess krefst.
  • Vetrarþjónustu vegarins virðist haldið í algjöru lágmarki. Snjór og krap fær að liggja órutt á veginum þar til hnausþykkt slapp eða klaki fær að myndast sem skapar algjörlega óþarfa hættu. Á meðan má oft sjá fjölda bíla hálkuverja og ryðja auða vegi í nágrenninu.


Við skorum á Bæjarstjórn Ölfuss að þrýsta á þar til bær yfirvöld bæta úr ástandinu.
Við skorum á fjarskiptafyrirtæki að bæta úr símasambandi á veginum.
Við skorum á Vegagerðina að ryðja og hálkuverja veginn að eigin frumkvæði.
Við skorum á ríkisstjórn Íslands að bæta úr fjárskorti Vegagerðarinnar áður en ástand vega verður að óyfirstíganlegu vandamáli.

Við krefjumst þess að við og ástvinir okkar ásamt öðru fólki sé ekki í stórhættu á ferðum sínum vegna vandamála sem vel statt samfélag hefur góð tök á að laga.



Today: Íbúar og vegfarendur í Ölfusi is counting on you

Íbúar og vegfarendur í Ölfusi needs your help with “Tryggjum öryggi vegfarenda í Ölfusi”. Join Íbúar og vegfarendur í Ölfusi and 961 supporters today.