Pola revocación d'honores a Vicente Álvarez Areces

0 personas han firmado. ¡Ayuda a conseguir 500!


Vicente Alberto Álvarez Areces (1943-2019) foi un conocíu dirixente del PSOE n’Asturies. Foi alcalde de Xixón demientres doce años, presidente d’Asturies otros doce años y llueu atopó abellugu en Madrid comu senaor.

En marzu de 2019, el Conceyu Xixón otorgó-y el títulu de Fíu Predileutu de la Villa de Xixón, a títulu póstumu. Y n’agostu de 2019, el Gobiernu d’Asturies, presidíu pol miembru’l PSOE Adrián Barbón, concedió-y la Medalla d’Oru d’Asturies, a títulu póstumu.

Pero en setiembre de 2019, el Tribunal Supremu español espublizó la so sentencia sobro los fechos conocíos comu casu Riopedre-PSOE o casu Marea, qu’afeutaron fonda y masivamente a l’alministración pública asturiana nos años en que Vicente Alberto Álvarez Areces foi presidente’l Gobiernu d’Asturies.

El Tribunal Supremu confirmó los delitos de prevaricación, malversación, cohechu y falsedá de los yá condergaos pola Audiencia Provincial d’Asturies, afitando pa ellos multes y penes de varios años de prisión. Ún de los condergaos ye José Luis Iglesias Riopedre, naquel tiempu Conseyeru d’Educación del Gobiernu d’Álvarez Areces, y otra María Jesús Otero, entós Direutora Xeneral d’Educación, amás dambos collacios presonales d’Álvarez Areces.

El Tribunal Supremu consideró acreitao que nel tiempu en que Vicente Alberto Álvarez Areces presidió’l gobiernu asturianu “quedó sostancialmente corrompíu’l procedimientu d’axudicación de contratos de suministru y d’obres en varies Conseyeríes” d’esti gobiernu, a saber la Conseyería d’Educación, la Conseyería d’Asuntos Sociales, la Conseyería de Cultura y la Conseyería d’Alministraciones Públiques.

El Tribunal Supremu afitó na so sentencia que colos fechos condergaos non sólo resultó ñidiamente perxudicáu’l padremuñu públicu asturianu, “sinón que se llantó de facto un sistema d’axudicación de los contratos conveníos cola Alministración qu’afeutaba a tol sistema de la Comunidá Autónoma y non sólo al padremuñu d’ésta”, pola comisión de delitos de cohechu, malversación, prevaricación y falsedá, polo que, en términos políticos, puen definise aquellos años de mala gobernanza comu de corrución sistémica.

D’estos fechos reconocíos por sentencia’l Tribunal Supremu, derívase la inescusable responsabilidá política (pos la penal yá nun se podrá demostrar enxamás) que nestos fechos tuvo l’entós  presidente del Gobiernu d’Asturies, Vicente Alberto Álvarez Areces.

Poro, los firmantes d’esta campaña desiximos:

1.      Que se revoque la concesión de la Medalla d’Oru d’Asturies y el títulu de Fíu Predileutu de la Villa Xixón, otorgaos dambos a Vicente Alberto Álvarez Areces.

2.      Que nun se conceda indultu dalu a los condergaos pola Audiencia Provincial d’Asturies y pol Tribunal Supremu nel conocíu comu casu Riopedre-PSOE o casu Marea, condergaos por prevaricación, malversación, cohechu y falsedá.

3.      Qu’estos condergaos cumplan la totalidá de la so pena de cárcele.

4.      Qu’estos condergaos se vean forciaos a la devolución íntegra de tolos millones d’euros que malversaron y/o de los que s’apropiaron.