కుమార్తెలను బడిలో చేర్చేటప్పుడు కులమతాల వెల్లడికి నిరాకరించా కమల్‌హాసన్‌ వెల్లడి చెన్నై, న్యూస్‌టుడే: తన కుమార్తెలను పాఠశాలలో చేర్చే సమయంలో దరఖాస్తులో కులమతాలను వెల్లడించడానికి నిరాకరించానని ఎంఎన్‌ఎం అధ్యక్షుడు, ప్రముఖ నటుడు కమల్‌హాసన్‌ తెలిపారు. ‘ఆస్క్‌ కమల్‌హాసన్‌’ అనే హ్యాష్‌ట్యాగ్‌తో తన అభిమానులు, కార్యకర్తలు, ప్రజలు ట్విట్టర్‌లో అడిగిన ప్రశ్నలకు ఆయన సమాధానాలు ఇచ్చారు. నాన్సి అనే ఓ నెటిజన్‌ కులానికి సంబంధించి ప్రశ్నిస్తూ శనివారం ఓ ట్వీట్‌ చేశారు. దీనిపై కమల్‌హాసన్‌ స్పందిస్తూ.. తన ఇద్దరు కుమార్తెలను పాఠశాలలో చేర్చేటప్పుడు దరఖాస్తులో కులమతాలను వెల్లడించలేదన్నారు. ఇది అలాగే తర్వాతి తరాలకు చేరుతుందని తెలిపారు. అదే కులమతాలను నిర్మూలించడానికి ఏకైక మార్గమని, దీనిని ప్రతి ఒక్కరూ చేయాలని సూచించారు.