Ne, shqiptarë nga të gjitha trojet dhe diaspora shqiptare kudo në botë, u drejtohemi përmes kësaj thirrjeje publike institucioneve shtetërore dhe kulturore në Maqedoninë e Veriut, Kosovë dhe Shqipëri, si dhe përfaqësuesve politikë përkatës, që të ndërmarrin hapa konkretë dhe të menjëhershëm për kthimin e eshtrave të Rilindasit Gjerasim Qiriazi nga Strumica në Manastir.

Gjerasim Qiriazi ka lindur në fshatin Tërnovë të Manastirit dhe ishte një nga figurat më të shquara të Rilindjes Kombëtare Shqiptare. Si shkrimtar, mendimtar dhe veprimtar i palodhur i çështjes kombëtare, ai i përket Manastirit jo vetëm për nga lindja, por edhe për nga rrënjët e veprimtarisë së tij atdhetare. Është një detyrim moral dhe historik që ai të prehet në vendlindjen e tij.

Më 2 janar 1894, në moshën vetëm 35-vjeçare, Gjerasim Qiriazi u nda nga jeta, duke lënë pas një trashëgimi të jashtëzakonshme në fushën e arsimit, kulturës dhe ndërgjegjes kombëtare shqiptare. Kontributi i tij zë një vend të veçantë në historinë e kombit dhe mbetet i gjallë në kujtesën tonë kolektive.

Kthimi i eshtrave të Gjerasim Qiriazit në Manastir do të përbënte:

një akt drejtësie historike,
një shprehje të dinjitetit kombëtar,
dhe një respekt institucional ndaj figurave themeltare të identitetit shqiptar.
Përmes këtij peticioni, ftojmë të gjithë shqiptarët, shoqatat kulturore, intelektualët dhe institucionet përkatëse që ta mbështesin këtë kërkesë legjitime, në mënyrë që nderimi ndaj Gjerasim Qiriazit të mos mbetet vetëm simbolik, por të shndërrohet në veprim konkret.

Nderimi i figurave tona historike është nderim për vetë kombin shqiptar.