O Castro de Torroso (Mos) foi un referente arqueolóxico dende o seu descubrimento en 1983 ata 1990, ano en que se suspenderon as escavacións pola falta de entendemento cos propietarios das parcelas. Dende entón ata hoxe pasaron 26 anos sen que se fixera ningunha intervención máis para poñer en valor este xacemento, atopándose actualmente nun estado de total abandono.

O primeiro paso para a recuperación deste castro é que estes terreos sexan de titularidade pública, requisito imprescindible para retomar calquera proxecto de recuperación. Pero ata o de agora ningunha administración realizou o máis mínimo esforzo para a adquisición destas parcelas e os propietarios nunca recibiron unha oferta de compra.

É preciso que este legado dos nosos ancestros e símbolo da identidade cultural do noso pobo sexa posto en valor, xa que coidar o patrimonio é unha obriga para todas/os nós!. Pero esta responsabilidade teñen que asumila as administracións e non as veciñas/os.

Por iso pedimos a túa axuda, para solicitalle ás administracións (local e Xunta de Galicia) este primeiro paso imprescindible para o futuro do castro de Torroso.

Axúdanos a facer que este Castro reciba dos coidados que precisa.