Kami, mga mamamayang Pilipino, ay tumututol sa tangkang pagtatayo ng diktadura ng administrasyong Duterte. Sa pamamagitan ng pagbibigay kapangyarihan sa Kongreso na buuin ang Constituent Assembly o Con-Ass, isasakatuparan ang pagbabago ng Konstitusyon o Charter Change (Cha-Cha) na ultimong magiging tungtungan ng pagtatayo ng isang marahas at mapanupil na pamamahala.

Tayo ay nagkakaisa laban sa Con-Ass at Cha-Cha ng Pangulong Duterte na naglalayong palawigin ang termino ng mga nakaupo sa puwesto, magbigay ng mala-diktador na kapangyarihan sa ehekutibo, i-konsentra ang lahat ng kapangyarihan sa iilang pamilyang namumuno, tanggalin ang mga batayang karapatan ng mamamayan, at bigyang laya ang mga dayuhan ng buong-buong pagmamay-ari sa mga lupain at yaman ng bansa. 

Ang ating paglagda ay tanda ng ating pagkakaisa at panata na:

1.    Pigilan ang anumang pamamaraan upang ipasa ang Cha-Cha at/o anupamang tipo ng diktadura;

2.    Hikayatin ang mas marami pang mamamayan na makiisa sa ating paglaban; at

3.    Lumahok sa iba’t-ibang tipo ng pagkilos upang ipahayag ang ating mga hinaing.

Hangga’t nananatiling banta ang Cha-Cha ni Pangulong Duterte na maka-sarili, kontra-mamamayan at maka-dayuhan, hindi tayo titigil sa paglaban dito. Hindi tayo mangingimi sa pagharap sa mga banta ng mapanupil na administrasyong Duterte.

CON-ASS AT CHA-CHA NI DUTERTE, IBASURA! NO TO TERM EXTENSION! NO TO 100% FOREIGN OWNERSHIP!