Бараме Градот Скопје да овозможи бесплатен јавен превоз за време на екстремна загаденост, за да се преполови бројот на автомобили на улиците, а со тоа и загадувањето од издувни гасови.

Веќе подолг период во воздухот има 5-20 пати повеќе ПМ10 честички. Последната студија на Институтот за јавно здравје во соработка со фински експерти покажа дека аерозагадувањето е причина за 1.300 смртни случаи и 250 милиони евра финансиска загуба годишно, а дека сообраќајот е меѓу најголемите загадувачи во Скопје.

Со воведувањето задолжителни електронски билети се создаде хаос во градскиот превоз, со  недостиг на електронски картички и продажни места за нив, но и со поскап билет од досега! Ова е контрапродуктивно и наместо да го зголемува користењето на јавниот превоз, го јакне индивидуалниот автомобилски транспорт.

За здрав живот на граѓаните државата треба да намени буџетски средства за стопирање на  сите извори на загадување, за преминување на зелена економија и за компензација на  евентуалната економска штета на граѓаните и фирмите.