É habitual que nos días 24 e 25 de Xullo se produzan varios conflitos relacionados coa discriminación da simboloxía galega ou a utilización do noso idioma nas rúas de Compostela.
Normalmente acontecen ao darse actuación discriminatorias por parte de funcionarios policiais que limitan a circulación por determinadas zonas da cidade de persoas que portan autocolantes con simboloxía nacionalista, bandeiras galegas ou falan galego.
Neste 24 de Xullo, polo menos, 10 persoas foron testemuñas de que se situaron axentes da policía nacional nas distintas entradas á zona vella de Compostela e impediron a entrada a persoas que falaban en galego mentres deixaban persoas que conversaban ou se dirixían aos axentes en castelán.
Algunhas das persoas afectadas só conseguiron entrar na zona vella de Compostela por medio dun local de hostalería con entradas na zona vella e na zona nova.
É realmente grave que se sigan dando situacións de discriminación dese tipo. O Valedor do Pobo xa tramita un expediente pola discriminación que sofre a simboloxía do noso país (o A.4.Q/841/13) e considero que é importante que investigue estas denuncias tamén.