O día 2 do pasado mes de decembro, o PP acordou en Xunta de Goberno Local subir as tarifas do prezo do autobús urbano, non só a xenérica, senón tamén o bono social destinado a persoas desempregadas, estudantes, discapacitadas e pensionistas. E isto, malia saber dos grandes beneficios que obtén a Compañía de Tranvías grazas ás subvencións excesivas que lle outorga o Concello da Coruña. Segundo datos do Rexistro Mercantil, no 2010 a Compañía de Tranvías tiña unha necesidade de subvención de 3,1 millóns. Malia isto, o Concello achegoulle 7,3 millóns, o que significa que a empresa gañou 4,2 millóns grazas ás axudas que lle deu o Concello. Dados estes beneficios, a empresa de autobuses repartiu entre os seus accionistas 2 millóns de euros de todos os coruñeses e coruñesas. Neste contexto, o BNG presentou unha moción, rexeitada polo PP, para que se revisase a concesión da Compañía de Tranvías e para que se fiscalizasen as contas da empresa. Tamén presentou o BNG un recurso contra a decisión da Xunta de Goberno Local de incrementar o prezo do bus, xa que o PP aplicou de xeito incorrecto a fórmula estabelecida para o cálculo da tarifa. É inadmisíbel que o PP aprobe unha suba do prezo do autobús cando mesmo conxelou o Salario Mínimo Interprofesional e cando a crise está a afogar as familias, á vez que a Compañía de Tranvías se enriquece a conta dos usuarios e usuarias do bus. Transmítelle ao alcalde da Coruña o teu rexeitamento á ao incremento do billete do autobús e pídelle que o baixe.