Tras a aprobación do Anteproxecto de Lei Orgánica do Poder Xudicial polo Goberno, constátase que a maioría das Comarcas de Galiza están destinadas a perder a súa condición de partidos xudiciais e, con ela, a deixar polo caminho os servizos proprios de tais entidades: xulgados de paz, rexistros civís, xulgados de instancia, etc.

O proxecto gobernamental integra, os Partidos Xudiciais de Verín e Xinzo de Limia, así como a maioría dos da provincia, nun único ente, con sede na cidade de Ourense. O mesmo que están facendo coa xestión hospitalar. 

A  máquina esmagadora de servizos públicos posta en marcha, non ten límites. Calquera día imos erguer coa noticia de que trasladan as escolas de primaria de toda a provincia á cidade de Ourense ou, quen sabe se no futuro, a Zamora. Baixo o paraugas da crise económica aténtase, sen complexos, contra os dereitos da cidadanía, mentres se inxectan miles de milhóns de euros no sector financeiro e na banca, pra que tres segan vivindo a custa da maioría. A crise pagámola os cidadáns e cidadás e os nosos impostos acaban nas contas de resultados dos que a provocaron.

A nenguén lhe esquece a importancia que pras comarcas de Monterrei e A Limia ten o mantemento dos partidos xudiciais, tanto dende a prespectiva institucional, como dende a prespectiva dos servizos que presta aos cidadáns e cidadás. A supresión dos citados partidos xudiciais pode provocar que os limiaos/ás e os verineses/as deban acodir, pra facer calquera trámite civil ou xudicial a Ourense.

Ante tal panorama a Unión Local de Verín e A Limia da Confederación Intersindical Galega considera que a cidadanía,  comezando polos que a representan, debe mobilizarse e impedir a perda de mais servizos públicos.

Por tais motivos, é polo que a CIG che solicita que asines esta petición, dirixida ao Ministro de Xustiza do Estado Espanhol, ao Presidente da Xunta de Galiza e ao Senador por designación da Comunidade Autónoma de Galiza e Alcalde de Verín, Juan Manuel Jiménez Morán; co obxecto de facelos reflexionar e que, o primeiro, retire do anteproxecto de lei a proposta de suprimir os partidos xudiciais de Verín e Xinzo de Limia e, mesmo, reformule a norma no seu conxunto e, os outros dous, en exercicio dos seus cargos, defendan os intereses de Galiza, de Verín e de Xinzo de Limia, reclamando a retirada do anteproxecto de lei e, no seu caso, votando en contra do mesmo no Senado.