Perante o plan de RENFE de suprimir os servizos entre A Coruña e Ferrol e a pretensión de eliminar servizos de media distancia en Galiza, en nome dunha política de reestruturación e liberalización, as e os abaixo asinantes rexeitamos con enerxía estas medidas e esiximos do Goberno do Estado e das devanditas empresas públicas:

1. Mellorar os servizos de media distancia actuais, tanto en número de frecuencias como no material rodante, abaratar as tarifas e executar un plan urxente de mellora da infraestrutura (como o traspase en Betanzos), co fin de reducir o tempo de viaxe entre A Coruña e Ferrol, que na actualidade ten unha duración de 1 h. 15 min.

2. Potenciar as infraestruturas ferroviarias coa posta en servizo das vías de ferro que atravesan as distintas localidades da comarca e pasan polos polígonos industriais, polo Campus de Elviña e polo porto e chegan o centro da Coruña, até a Praza de Ourense.

3. Demandar da Xunta e do Goberno do Estado o inicio de negociacións para transferir as competencias en materia ferroviaria nos devanditos corredores á Galiza, co financiamento e os medios adecuados, para a creación dunha Compañía Ferroviaria Pública Galega.