Igeldoko komunitatea osatzen duten biztanleei zor diegu, beraz, bere buruaren jabe izateko aukera. Gurea ez da inoren kontrako mugimendua, eta are gutxiago Donostiaren kontrakoa. Aitzitik, Igeldok, adiskidetasunezko harremana izan nahi du bai Donostiarekin eta bai Gipuzkoako gainerako udalerriekin ere. Adiskidetasuna, ordea, berdinen arteko harremana da, eta horixe da beraiek eskatzen dutena: utzi ditzatela beste 88 udalerrien adiskide eta, haiekin batera, Gipuzkoa osatzeko auzolanean 89. partaidea izaten.

Igeldoko herritarren gehiengoak hala eskatzen du, eta orain arteko ibilbideak argi eta garbi erakusten du leialtasunetik ari direla. Jada egin dute euren esku zegoena; orain instituzioei eta erakundeei dagokie bide horretan hurrengo urratsa egitea, eta horixe da, hain zuzen ere, eurengandik espero duguna eta testu honen bidez ozenki eta irmo eskatzen dieguna.