KOTE LAJAN PETROCARIBE A!

0 a signé. Allez jusqu'à 5 000 !


Ayiti se peyi ki pi pòv nan Amerik la pandan anpil lajan ki te ka ede nan chanje kondisyon lavi pèp la gaspiye, gagote, vòlè epi Lajistis bèbè. 

Anpil nan lajan sa yo, se don men genyen se prete Leta prete yo, pou mwen ak ou peye, pou pitit ak pitit pitit nou peye, tankou lajan Petwo Karibe a.

Lajan PetwoKaribe a sòti nan yon pwogram peyi Venezuela mete kanpe pou ede anpil peyi jwenn chimen devlopman. Ayiti t’ap achte gaz kredi, selon pri barik gaz la sou mache entènasyonal la, bay BMPAD vann li ak gwo distribitè pwodwi petwolye yo epi bay Leta lajan an pou fè wout, pon, konstwi lekòl, inivèsite, lopital, modènize estrikti leta a epi mete kanpe tout pwogram ki ka konbat lamizè. 

Ak lajan PetwoKaribe a, AYITI te dwe kreye anpil richès men nou konstate, pwennfèpa. Lajan an voltije tonbe nan pòch zotobre nan Leta a ak gran manjè nan sektè prive a, si n ka kwè Rapò Komisyon Espesyal Sena repiblik la ak rezolisyon li te pran pou voye dosye sa devan Lakou #des comptes. Eske pèp Ayisyen ap jwenn Jistis! Eske pwosè PetroKaribe a ap rive fèt, pou piyaje yo ta remèt lajan an epi dedomaje nasyonal an!

Lajan n’ap pale a, se gwo lajan ak kòlèt:

1) 10 Septanm 2008: René Préval ak Michèle Duvivier Pierre-Louis dekese 197 500 000 Dola vèt;

2) 10 Fevriye 2010: René Préval ak Jean Max Bellerive dekese 157 719 896.18 Dola vèt;

3) 23 Out 2010: 94 597 097.69 Dola ameriken;

4) 11 Me 2011: 95 923 836.14 Dola ameriken;

5) 24 Fevriye 2011: Michel Martelly ak Gary Conille dekese 210 303 222.68 Dola vèt;

6) 16 Jiyè 2012: Michel Martelly ak Laurent Salvador Lamothe dekese 96 195 625.80 Dola vèt;

7) 21 Desanm 2012: Michel Martelly ak Laurent Salvador Lamothe dekese 329 386 735.05 Dola ameriken;

8) 11 Desanm 2013: Martelly/Lamothe dekese 184 517 228.97 Dola vèt;

9) 23 Jiyè 2014: Martelly/Lamothe dekese 71 215 839.30 Dola vèt;

10) 10 Septanm 2014: Martelly/Lamothe dekese 7 000 000 Dola ameriken;

11) 15 Avril 2015: Michel Joseph Martelly ak Evans Paul dekese 254 423 560 Dola ameriken;

12) 22 Jiyè 2015: Martelly/Paul dekese 193 055 824.55 Dola vèt;

13) 5 Janvye 2016: Martelly/Paul dekese 58 169 108.58 Dola ameriken;

14) 28 Septanm 2016: Jocelerme Privert ak Enex Jean-Charles dekese 33 268 729 Dola ameriken. 

Yon total 3.8 Milya Dola ameriken dekese. Eske lajan an depanse nan enterè peyi a! Tout rapò yo di non, tout endikatè yo di non. Eske zak malonèt sa, gwo krim sa ap rete san pini! Jwèt pou pèp ayisyen. 

Petisyon sa vize denonse “détournements, surfacturation, impunité, corruption de tout genre” epi sansibilize chak ayisyen sou wòl li dwe jwe nan pwosè PetwoKaribe a. 

 


Voulez-vous partager la pétition ?