La Fundación “Princesa de Asturias” tien convocá la XXXII edición del Premiu al Pueblu Exemplar. La organización nacionaliega asturiana Andecha Mocedá presentó oficialmente a esta convocatoria la candidatura d’un llugar bien exemplar: l’Emiratu d’Abu Dabi.

Abu Dabi presenta dos méritos bien valibles:

-          Abu Dabi ye un llugar que destaca polos sos manifestamientos de solidaridá sobresalientes, comu l’acoyía y proteición del ciudadanu español Juan Carlos I de Borbón, qu’abandonó apriesa l’Estáu español tres facese públicos dalgunos de los sos enguedeyos financieros y fiscales.

-          Abu Dabi ye tamién un llugar qu’afala davezu iniciatives d’impulsu económicu y social, comu amuesa al sofitar de contino les aiciones que, dende aquel Emiratu, protagoniza’l ciudadanu español Juan Carlos I de Borbón pa caltener y ameyorar los sos negocios.

Amás, los dirixentes y habitantes d’Abu Dabi carauterícense por un tipismu meritoriu, compuestu principalmente de tres rasgos notorios:

o   El so calter campechanu.

o   La so facilidá pa enllenase d’arguyu y satisfación.

o   La importancia que na so fraseoloxía tien la espresión “La xusticia ye igual pa toos”.

Defendemos esta candidatura y, amás, pidimos a la Fundación que nun considere causa d’esclusión el fechu de qu’Abu Dabi s’allugue a 6.000 kilómetros d’Asturies, porque tien de valorase, perriba too, que la población d’Abu Dabi amuesa un sentimientu talu d’asturianía que ye igual al sentimientu que tien el Pueblu Asturianu de ser un “principado” español.