#جميعا_من_اجل_الغاء_مسودة_قانون_رقم22/20

0 a signé. Prochain objectif : 10 000 !


مشروع_قانون20_22

بينما الشعب المغربي ملهي بآخر تطورات فيروس كورونا، حكومة سعد الدين العثماني تسابق الزمن باش تدوز واحد القانون ديكتاتوري غادي يكون وصمة عار فجبين المغاربة و يقلل حرية الأجيال القادمة أكثر من ماهي قليلة اليوم ، الحكومة كتحاول فأسرع وقت ممكن تضمن مصادقة لجنة العدل و التشريع و حقوق الإنسان فمجلس النواب على مشروع قانون 22.20 المتعلق بتقنين إستعمال شبكات التواصل الاجتماعي، هاد القانون كان قدمو وزير العدل محمد بن عبد القادر للمجلس الحكومي باش يأشر عليه يوم 19 مارس بدعوى سد الفراغ التشريعي لي كتعاني منو المنظومة القانونية لردع كل السلوكات المرتكبة فالسوشل ميديا ، خصوصا بعد المصادقة على اتفاقية بودابيست 2018 ديال الجريمة الإلكترونية، و ناضت الحكومة أسيدي دارت لجنة حكومية تقنية و لجنة وزارية لهاد الغرض باش تزرب عليه محد بنادم ملهي بكورونا، مشورع القانون بكل بساطة هو تقييد سافر لحرية التعبير فوسائل التواصل الاجتماعي و انتهاك صارخ لدستور 2011 لي كايعطي الحق فالتعبير و الحصول على المعلومة لكل المغاربة ، بحيث بغاو يكتفو كل ما ينشر أو يبث على وسائل التواصل الاجتماعي حسب قواعد موضوعة من طرفهم بحال شي جلابة فصلوها كيما بغاو على عبارهم ، و أي واحد كايخالف هادشي كتتسناه عقوبة حبسية أقصاها ثلات سنوات بلا دكر الغرامات لي تقدر توصل ل50000 درهم ، يعني بخلاصة القول الحكومة غادي تتحكم فصناعة المحتوى الرقمي، بل الخطير أن بعض مواد هاد القانون مزال كايلف حولها الغموض لأنها فكل المواثيق الكونية هي ماشي جريمة بحال المادة 14 لي كاتعاقب أي واحد دعى لحملة مقاطعة ديال شي منتوج أو خدمة معينة ، و إلى رجعنا بالوقت لنهار 19 فاش تم التأشير على هاد القانون غادي نلقاو غضب جامح فأوساط الشعب المغربي على تدني جودة الإنترنت ديال إتصالات المغرب، كأن الحكومة و البرلمان لي حنا وكلنا ليه مهمة التحدث بإسمنا ولا كايتحدث و يدافع على مصلحة الشركات و يصيفط المستهلك للحبس..
مشروع قانون مصيري بحال هدا خاصو مناقشة طويلة ماشي شن طن حيد بالاك، لأنه دبا فمجلس النواب كايحضرو غير رؤساء الفرق و المجموعات النيابية و عضوين من كل فريق و مجموعة نيابية في حين قانون بحال هدا خاصو يحضرو ليه جميع ممثلي الأمة.
حنا ضد المعلومة المغلوطة و صحيح خاصنا نضربو بقبضة من حديد كل من يروجها ، لكن باش تولي السوشل ميديا بالمغرب بحال كوريا الشمالية لا لا و ألف لا ، إلى جاب الله صادق البرلمان على هاد مشورع القانون غير صليو صلاة الغائب على حرية التعبير فوسائل التواصل الاجتماعي أو بالأحرى غير نسدو هاد تليفونات، نرجعو لنوكيا بيل و نتونسو بسمير الليل �
#بقا_فداركم
#سير_تجمد
#سد_فمك