Үнийн өсөлт айл өрх бүрт ширээний голд тавьсан лаа шиг тод харагдах боллоо. Дэлгүүрийн сагс, 20 мянгатын дэвсгэртийн хэмжээ нь хэвээрээ ч уутлаад гарах хүнс нь цөөрсөөр байгааг та, бид нүдээрээ харж байна. Гэсэн ч зүгээр үү тэ?

Төр бидний хөдөлмөрөөрөө олж авсан талхны ¼ дээр масло, варенье түрхээд өгье гэх нэрийдлээр авчихаад хатаж, хөгцөрсөн хойно нь эргүүлэн өгч байна. Зүгээр үү тэ? Сар бүрийн цалингаараа ширээн дээрээ тавьдаг хүнс бүрт 10%-ийн НӨАТ, гаалийн татвар дунджаар 15.5%, дээр нь инфляцийн 14% шингэсэн байна. Бас л зүгээр үү тэ?

Ийм байтал бид ярисаар, п-гаа уншиж бухимдсаар, хэн нэгэн бидний ирээдүйг өөрчилж өгөхийг харж суусаар ирлээ. Харин одоо залхлаа. Юу ч зүгээр биш байна. Гэхдээ бид хэрүүл хийхгүй, тодорхой шийдлийн төлөө дуу хоолойгоо нэгтгэх болно!

Шийдэл

НӨАТ-ын сугалааг цуцалж, улирал тутмын буцаан олголтыг 100% болгох, эсвэл НӨАТ-ыг нэг мөр болиулах.

Авсан ширхэг бараа бүтээгдэхүүн бүрдээ бид 10%-ийн НӨАТ төлж байна. Үүний ердөө 2%-ийг бид буцаан авдаг ба аз таарвал сугалаагаар дамжуулан 30,000 төгрөг нэмэлтээр буцаан авдаг. Дундаж орлоготой өрхийн улирлын хэрэглээний зардал 3.3 сая төгрөг гэж үзвэл 89.9%-ийг /хуудас 4/ хүнс болон хүнсний бус хэрэглээ буюу НӨАТ-тай бүтээгдэхүүн, үйлчилгээ эзэлдэг. Ингэж бодвол, улиралд дунджаар 296,670₮-ийн НӨАТ төлж байгаа ч ердөө 59,339₮-ийг буцаан авч байгаа юм. 

НӨАТ-ын сугалаа нь гэмшсэн сэтгэлээр бидэнд эргүүлэн өгч буй “модон чихэр” бөгөөд бид ч оргүйгээс гэх хандлагаар түүнийг нь үмхсээр л байна.